Rusiyada hərbi xidmətə yaz çağırışı aprelin 1-dən başlayıb və iyulun 15-dək davam edəcək.
Modern.az xəbər verir ki, 2025-ci ildə 160 min yeni çağırışçının hərbi xidmətə cəlb edilməsi planlaşdırılır ki, bu da 2011-ci ilin payızından bəri ən yüksək göstəricidir. 2008-ci ildə xidmət müddəti 12 aya endirilən zaman çağırışçıların sayı xeyli artıb. O, 2009-cu ilin yazında 305,6 min nəfərin orduya çağırıldığı zaman pik həddinə çatıb. Sonrakı illərdə çağırışçıların sayı getdikcə azalıb. Rusiyanın bütün müasir tarixində ən az çağırışçı sayı 2022-ci ilin payızında hərbi xidmətə çağırılıb - 120 min nəfər.
Bu ilki yaz çağırışı son 14 ildə ən böyük çağırışdır. Çağırışçıların sayındakı bu artım Rusiya Prezidenti Vladimir Putinin Silahlı Qüvvələrin şəxsi heyətinin mərhələli şəkildə artırılması haqqında fərmanlarının icrası ilə bağlıdır. Əgər 2022-ci ilin əvvəlində Rusiyada 1 milyona yaxın hərbi qulluqçu var idisə, növbəti üç il ərzində bu rəqəmin 1,5 milyona çatdırılması planlaşdırılır.
