Akademik Məmməd Əliyev Azərbaycan Prezidenti İlham Əliyev tərəfindən “Şərəf” ordeni ilə təltif olunması xəbərini böyük sevinclə qarşılayıb. O qeyd edib ki, qalib dövlətin Prezidentindən mükafat almaq ikiqat şərəfdir.
Modern.az xəbər verir ki, bu fikirləri dünyaşöhrətli onkoloq, həmyerlimiz, akademik Məmməd Əliyev 70 illik yubileyi günü AZƏRTAC-a müsahibəsində söyləyib.
Xatırladaq ki, aprelin 8-də Prezident İlham Əliyev Azərbaycan ilə Rusiya arasında əlaqələrin inkişafında böyük xidmətlərinə və uzunmüddətli səmərəli ictimai fəaliyyətinə görə akademik Məmməd Əliyevin “Şərəf” ordeni ilə təltif edilməsi barədə Sərəncam imzalayıb.
“Azərbaycan Prezidenti İlham Əliyev tərəfindən yüksək mükafata layiq görülmək mənim üçün böyük xoşbəxtlikdir. İlham Heydər oğlunun məni “Şərəf” ordeni ilə təltif etmək barədə sərəncam verdiyini bildikdə böyük sevinc hissi keçirdim. Xüsusilə də Azərbaycanın qalib ölkə statusunda olması daha böyük xoşbəxtlikdir. Bu halda mükafatlar daha dərin gözəl hisslər bəxş edir. Əvvəlki mükafatlar da xoş təsir bağışlayıb, amma indi bu hiss tamam fərqlidir”, – deyə o vurğulayıb.
Yetmiş illik yubileyi münasibətilə özünə nə arzulayacağı barədə sualı cavablandıran akademik bildirib ki, əsas istəyim yaxınlarımın, dostlarımın və tələbələrimin etimadını doğrultmaqdır: “Əgər 70 ilim hədər getməyibsə, qoy bundan sonrakı ömrüm də yaxınlarımın və tələbələrimin məndən gözləntilərinə uyğun keçsin. Heç vaxt onları məyus etməyim”.
Onun sözlərinə görə, hərçənd 70 yaşında artıq peşəkar kimi özünü təsdiqləyib, amma əsas məsələ təcrübəni bölüşməkdir: “Mənim parlaq məktəbim var. Bu gün Rusiyada 15 klinika eyni standartlarla əməliyyatlar aparır. Biz Rusiyada və MDB məkanında ciddi bir komanda formalaşdırmışıq. Azərbaycanda Cəmil Əliyevin və Əhliman Əmiraslanovun da gözəl məktəbləri var. Biz vahid protokollarla, bir komanda kimi işləyirik”.
Məmməd Əliyev bildirib ki, 70 yaşdan sonra insan üçün tələbələrinin uğurlarına sevinmək xüsusilə önəmlidir və o, öz işinin davamını məhz onların nailiyyətlərində görür.
M.Əliyev tibb elmləri doktoru, professor, Rusiya Elmlər Akademiyasının və Rusiya Tibb Elmləri Akademiyasının akademiki, Gürcüstan Milli Elmlər Akademiyasının əcnəbi üzvü, Dövlət Mükafatı və Hökumət Mükafatı laureatı, Rusiyanın Əməkdar elm xadimidir. Uzun müddət Rusiya Səhiyyə Nazirliyinin N.N.Bloxin adına Onkologiya MTTM-də elmi və tibbi işlər üzrə direktor müavini vəzifəsində çalışıb, Uşaq Onkologiyası və Hematologiyası Elmi-Tədqiqat İnstitutunun direktoru olub. Hazırda Rusiya Federasiyası Səhiyyə Nazirliyinin “Milli Tibbi Tədqiqat Radiologiya Mərkəzi” Federal Dövlət Büdcə Müəssisəsində baş direktorun müşaviridir. O, Rusiya Elmlər Akademiyasının Fiziologiya şöbəsinin Rəyasət Heyətinin üzvü və Fundamental Tibb bölməsinin rəhbəri, Sarkomaların Tədqiqi üzrə Şərqi Avropa Qrupunun prezidenti, 500-dən çox çap olunmuş əsərin müəllifidir.
Soydaşımız “Dostluq” və “Şöhrət” ordenləri, Azərbaycan Prezidentinin Fəxri diplomu, habelə Rusiyanın “Dostluq” ordeni və digər dövlət mükafatları ilə təltif edilib.
O, həkimlik fəaliyyəti ilə yanaşı, həm də fəal ictimai xadim kimi tanınır. M.Əliyev 15 ildən artıqdır ki, Rusiyadakı soydaşlarımızın ən böyük diaspor təşkilatı olan Ümumrusiya Azərbaycanlılar Konqresinə rəhbərlik edib.
