Erməni tərəfi hələ ki Minskdə Müqəddəs Qriqori erməni kilsəsinin açılışına dəvət almayıb.

Modern.az xəbər verir ki, bu barədə “Sputnik Ermənistan”a Ermənistan Xarici İşlər Nazirliyindən bildirilib.

Minskdəki Müqəddəs Qriqori erməni kilsəsi 2025-ci ilin mayında fəaliyyətə başlayacaq.

Ermənistan Xarici İşlər Nazirliyi “Minskə kimlər gedəcək?” sorğusuna “heç bir dəvət alınmayıb”, - cavabını  verib.

Qeyd edək ki, hazırda rəsmi İrəvanla Minsk arasında münasibətlər rəvan deyil. Münasibətlərdə gərginlik Belarus prezidenti Lukaşenkonun Qarabağ müharibəsinin nəticələri ilə bağlı bəyanatlarından sonra yaranıb. Baş nazir Nikol Paşinyan bildirib ki, müharibə zamanı Belarus lideri faktiki olaraq Azərbaycanın tərəfində olub. Buna görə də Paşinyan Ermənistan rəsmilərinin Belarusa səfərini qadağan edib.

Hələ 2024-cü ilin iyununda Paşinyan bəyan etmişdi ki, Lukaşenko bu ölkənin rəhbəri olduğu müddətdə heç vaxt Belarusa səfər etməyəcək. İki ölkənin Xarici İşlər nazirlikləri 2024-cü ilin iyununda nota mübadiləsi aparıblar və avqustda Lukaşenkonun növbəti sərt bəyanatından sonra Belarusun İrəvandakı səfirliyinin binası “pomidor atəşi”nə tutulub.

İndi Ermənistan mətbuatı sual edir: Paşinyan sözündən dönəcəkmi?