Türk Polis Təşkilatının 180-ci ildönümü münasibətilə ölkə üzrə silsilə tədbirlər keçirilir.
Modern.az xəbər verir ki, Konyada fəaliyyət göstərən azərbaycanlı jurnalist Nəzrin Məlikova sözügedən tədbirlərdən xüsusi videoreportaj hazırlayıb.
Reportajda Konya Polis İdarəsinin xidmətləri və polislərin fədakarlığı vurğulanır.
Videoda Konya polisinin geniş fəaliyyət sahələri – ictimai asayişin qorunmasından yol təhlükəsizliyinə, terrorizmlə və narkotiklərlə mübarizəyə qədər bir çox vacib sahədəki uğurlu əməliyyatları ətraflı şəkildə təqdim olunub. Bu sahələrdə çalışan polis əməkdaşlarının cəmiyyətin əmin-amanlığını təmin etmək üçün göstərdikləri əzmkarlıq və səy, reportajda xüsusi vurğulanıb.
Xüsusən, Konya Polis İdarəsində xidmət göstərən polislərin fədakarlığı və peşəkarlığına diqqət çəkilən videoda, onların hər gün həyati risklər altında, heç bir tərəddüd etmədən vətənin və vətəndaşların təhlükəsizliyi üçün mübarizə apardıqları qeyd edilib. Videonun sonunda, Türk Polis Təşkilatının 180 illik zəngin ənənəsinin, gələcək nəsillərə də örnək olacağı qeyd edilib.
