Azərbaycanda psixoloq müraciət edən şəxslərə münasibət birmənalı deyil. Hazırda insanın gündəlik yaşam tərzi onun psixologiyasında izlər qoya bilir. Düzgün zamanda bu təsirləri aradan qaldırmaq üçün isə psixoloq məsləhəti almaq önəmlidir. Lakin bəzi vətəndaşlar psixoloqlara qeyri-ciddi yanaşır. Hətta onlara müraciət edənləri “dəli” adlandırırlar. 

Ailə və uşaq psixoloqu Aynur İsmayılova mövzu ilə bağlı Modern.az saytına açıqlama verib.

Psixoloq deyib ki, əslində insanların ən böyük problemi öz qiymətini başqalarının gözü ilə dəyərləndirməsidir. Bu insanlara ailə, yaxın və ya uzaq qohumlar, dost-tanış və s. aid ola bilər. Bir insanın öz davranış və düşüncələrini başqasının gözü ilə ölçməsi düzgün deyil.

Ekspert bildirib ki, cəmiyyətdə “psixoloq” ilə “psixiatr” anlayışları həmişə qarışdırılır. Psixiatra öz danışıq və davranışlarına riayət edə bilməyən, ruhi xəstəlik daşıyıcıları, öz probleminin fərqində olmayan, özünə, başqalarına bilmədən əziyyət verən, insani düşüncələrdən uzaq şəxslər müraciət edir.

Psixoloqun pasiyentlərinə isə özlərinə, hiss və düşüncələrinə zərər verən, davranışları ilə başqalarını incitdiyini düşünən ən əsası bunun fərqində olan şəxslər müraciət edir. Nəticədə özləri və yaxud da yaxınların məsləhəti ilə könüllü psixoloqa müraciət edirlər.

Aynur İsmayılova vurğulayıb ki, sağlam insan həyatında bir dəfə də olsa, psixoloq müayinəsindən keçməlidir. Ona görə ki, ruh, düşüncə, davranış sağlamlığı fiziki və bədən sağlamlığına tam təsir edir. İnsan yeni paltar geyinəndə dərhal güzgüyə baxıb necə olduğunu görmək istəyir. Ancaq psixoloq da insana sağlamlıq güzgüsünü göstərir.

“Bu gün cəmiyyətdə bəziləri psixoloqa getməyi “dəb” kimi görürlər. Bu isə düzgün yanaşma deyil. Bunun adı insanın öz fərqinə varmasıdır. Texnologiyanın sürətli inkişaf anında yaşadığımız üçün insanlar bütün problemlərinin tez həll olunmasını istəyir. Təəssüflə qeyd etmək lazımdır ki, hazırda ən çox bölgələrdə, ucqar kəndlərdə psixoloqa müraciət edənlərə “dəli” , “havalanmış” biri kimi baxırlar”.

Müsahibimiz izah edib ki, cəmiyyətin bəzi nümayəndələri ilk olaraq bilməlidir ki, “dəli insan” özü gedib mütəxəssisə müraciət edə bilməz. Onun yaxınları müraciət edə bilər. Amma psixoloq pasiyentləri tam sağlam insanlardır və bunun da fərqindədirlər.

Zərif Sofiyeva