İranın xarici işlər naziri Abbas Arakçi aprelin 17-də Rusiyaya rəsmi səfərə gedəcək.

Modern.az xəbər verir ki, bu barədə İslam Respublikasının Rusiya Federasiyasındakı səfiri Kazım Cəlali sosial şəbəkədə məlumat yayıv

O qeyd edib ki, Arakçi Rusiyanın yüksək rütbəli rəsmiləri ilə məsləhətləşmələr aparacaq.

"İkitərəfli münasibətlərin, regional əməkdaşlığın və beynəlxalq aləmdə qarşılıqlı fəaliyyətin təşviqi - bütün bu mövzular səfərin iş gündəmindədir", - səfir vurğulayıb.

Diplomatın sözlərinə görə, mühüm beynəlxalq hadisələr fonunda İran və Rusiya rəsmiləri arasında sıx, daimi və etibarlı təmaslar xalqların mənafeyinə xidmət edəcək.

Bundan əvvəl Arakçinin Omanda amerikalılarla danışıqların nəticələrini Rusiya tərəfi ilə müzakirə etmək üçün Moskvaya gedəcəyi bildirilirdi.

Xatırladaq ki, aprelin 12-də Omanın paytaxtında prezident Trampın xüsusi nümayəndəsi Stiv Vittkoffla İranın xarici işlər naziri Abbas Arakçi arasında dolayı danışıqlar olub. ABŞ prezidentinin xüsusi nümayəndəsinin sözlərinə görə, danışıqlar müsbət və konstruktiv olub. Arakçi də bu danışıqların atmosferini konstruktiv və sakit adlandırıb, Omanın xarici işlər nazirinə İran və Amerika nümayəndə heyətləri arasında fikir mübadiləsi aparmaq səylərinə görə təşəkkür edib və İran və ABŞ arasında danışıqların ikinci mərhələsinin aprelin 19-da keçiriləcəyini bildirib.