BMT Baş Assambleyasının Rusiyaya qarşı ittihamları ehtiva edən qətnaməsinə dair səsvermə keçirlib.
Modern.az xəbər verir ki, “Birləşmiş Millətlər Təşkilatı ilə regional və digər təşkilatlar arasında əməkdaşlıq: Birləşmiş Millətlər Təşkilatı ilə Avropa Şurası arasında əməkdaşlıq” adlı sənədin lehinə 105, əleyhinə 9 ölkə, o cümlədən ABŞ səs verib. 33 ölkə bitərəf qalıb.
Azərbaycan və İsrail səsvermədə iştirak etməyib. Ermənistan isə sənədi dəstəkləyib.
Qətnamənin preambulasında xüsusilə “Rusiyanın Ukrayna və Gürcüstana təcavüzündən” bəhs edilir. Qətnamədə həmçinin “Rusiyanın Ukraynaya təcavüzü cinayəti üzrə xüsusi tribunalın yaradılması” üzərində iş getdiyi bildirilib.
Baş Assambleyanın iclasından sonra verdiyi açıqlamada ABŞ-ın BMT-dəki səfiri Conatan Şrayer Birləşmiş Ştatların Avropa Şurasının insan hüquqlarının müdafiəsi və inkişaf etdirilməsi, demokratiyanın inkişafı və qanunun aliliyinin təşviqi istiqamətində fəaliyyətini yüksək qiymətləndirdiyini, lakin qətnamənin ABŞ-ın iki ölkə arasında sülhün əldə edilməsi üçün faydasız hesab etdiyi Rusiya-Ukrayna müharibəsi ilə bağlı bəyanatlarla səsləşdiyini bildirib. Eyni zamanda, Birləşmiş Ştatlar ümid edir ki, Avropa Şurası və BMT-yə üzv olan bütün dövlətlər Rusiya və Ukrayna arasında hərtərəfli və davamlı sülhə nail olmaq üçün səyləri dəstəkləyəcək və gücləndirəcək.
