ADSEA İri Şəhərlərin Birləşmiş Su Təchizatı Xidmətinin Mingəçevir şəhər Sukanal İdarəsi Mingəçevir şəhərində içməli su təchizatı və kanalizasiya şəbəkəsi üzrə işlərini davam etdirir.
Modern.az xəbər verir ki, regionların sosial - iqtisadi inkişafı Dövlət proqramına uyğun olaraq 2011-ci ildən etibarən Mingəçevir şəhərində su şəbəkə və qurğularının yenidən qurulması işləri aparılıb. Bu məqsədlə məhsuldarlığı sutkada 55 min kub metr olan müasir sutəmizləyici qurğu və tutumu 10 min kub metr olan mərkəzi su anbarı tikilərək istismara verilib. Əhaliyə verilən su sutəmizləyici qurğuda 28 sayda qum süzgəcindən keçərək asılı hissəciklərdən təmizlənir və maye xlorla zərərsizləşdirilir. Emal olunmuş su qurğunun nasos stansiyasında quraşdırılmış 3 sayda nasos aqreqatı vasitəsilə 820 mm-lik boru ilə mərkəzi su anbarına ötürülür. Mərkəzi su anbarında depolanmış su tələbata uyğun olaraq 1000 mm-lik çıxış xətti vasitəsilə özüaxımlı rejimdə şəhərin su təchizatı şəbəkəsinə verilir. Mingəçevir şəhərində yeni su layihəsinin icrası başa çatdırılaraq abonentlərin istifadəsinə verilib. Kanalizasiya şəbəkəsinin yenidən qurulması işləri isə davam edir.
Mingəçevir şəhər Sukanal İdarəsinin rəisi Samir Əliyev diqqətə çatıdırıb ki, hazırda Nərimanov prospektində bu işlər davam etdirirlir. Layihəyə uyğun olaraq 250 kilometr kanalizasiya xəttinin 210 kilometri, yəni 84 faizi icra olunub. Şəhər ərazisində 250-ə yaxın yüksək mərtəbəli yaşayış evləri və 7 minə yaxın fərdi yaşayış evləri yeni şəbəkəyə qoşularaq vətəndaşların istifadəsinə verilib.
Mərkəzi su anbarından yüksək ərazidə yerləşən istehlakçıları su ilə təmin etmək üçün su anbarında quraşdırılmış 2 nasos aqreqatı istismar edilir. Zərurət yarandıqda suyun istehlakçılara çatdırılması üçün idarə tərəfindən 3 sayda məhəllədaxili su nasos stansiyasından da istifadə olunur. Hazırda idarənin abonent bazasında 33.500 abonent qeydiyyatdadır. Abonentlərin sayğaclaşma səviyyəsi isə 96,7 % təşkil edir. Şəhərin kanalizasiya şəbəkəsi üzrə idarənin istismarında 2 məhəllə daxili tullantı sutəmizləyici qurğu və 8 kanalizasiya nasos stansiyası var. Layihə üzrə şəhərdə 3 yeni kanalizasiya nasos stansiyası tikilib və istismara verilib, 1 nasos stansiyasının tikintisi başa çatdırılıb. Layihədə, həmçinin Xaldan şossesinin yaxınlığında sutkalıq gücü 65000 kub metr olan yeni tullantı su təmizləmə qurğusunun tikilməsi nəzərdə tutulur.
Samir Əliyev onu da qeyd edib ki, Mingəçevir Su Anbarından xam su sutkada 55 min kub metr istehsal gücü olan su filtrlərində təmizlənərək nasoslar vasitəsilə 10 min kub metrlik su anbarına ötürülür. Su anbarından özüaxımlı formada vətəndaşların istifadəsinə verilir. Şəhərin 97 faizində sayğaclaşma işləri aparılıb. Şəhərdə 24 saat fasiləsiz olaraq su təminatı aparılır.
Mingəçevir şəhər Sukanal İdarəsi Mingəçevir şəhəri ilə bərabər Yevlax rayonunun Havarlı, Hacıselli və Marzılı kəndlərinə də xidmət edir.
