Bazar günü Azərbaycanda xristianlar öz ali bayramları olan Pasxanı qeyd edəcəklər. Bu il Pasxa aprelin 20-ə təsadüf edir.

Şirniyyatlar bişirilir, paylanılır, İsa Məsihin dirilməsi qeyd olunur və icmalarda süfrələr açılır.

Modern.az-a açıqlamasında Qafqaz Müsəlmanları İdarəsinin sədrinin müavini Bəxtiyar Nəcəfov bildirib ki, Pasxa bayramı münasibətilə qurum və Şeyxülislam Allahşükür Paşazadə Xristian icmalarına təbrik ünvanlayacaq:

“Qafqaz Müsəlmanları İdarəsi, xüsusilə, şeyx həzrətləri (Qafqaz Müsəlmanları İdarəsinin sədri Allahşükür Paşazadə-red) Pasxa bayramı ilə bağlı Kirill cənablarına  və bütün xristian icmasına təbrik ünvanlayacaq. Onlar da bayramlarda bizə təbrik göndərib, şeyximizi təbrik edirlər”.

B.Nəcəfov söyləyib ki, dəvət olacağı təqdirdə QMİ-dən də Pasxa bayramı ilə bağlı keçiriləcək tədbirdə iştirak edənlər olacaq:

“Yepiskop tərəfindən dəvət olacağı təqdirdə QMİ-dən nümayəndələr, təbii ki, Pasxa ilə bağlı tədbirlərdə iştirak edənlər olacaq. Onlar həmişə bizim tədbirlərimizdə iştirak edirlər. Demək olar ki, Şeyx həzrətlərinin əsas diqqəti dinlər arası dialoqa yönəlib. Bir neçə ildə ən gözəl nail olduğu məsələlərdən biri də budur. Azərbaycan bu məsələdə bir nömrədir. Bu yaxınlarda Şeyx həzrətləri Bəhreyndə böyük tədbirdə iştirak edib. Orada Azərbaycanı dinlərarası dialoq sahəsində örnək gətirdilər. Dinlərarası, eləcə də məzhəblərarası birləşməyə, birlik, bərabərliyə heç də digər istər müsəlman, istərsə də qeyri-müsəlman dövlətləri nail ola bilməyiblər. Bu da şeyximizin ölkədə apardığı din siyasətinin təzahürüdür. Bu, sevindirici haldır”