Gəncə Dövlət Universitetində Azərbaycan Respublikası Prezidenti cənab İlham Əliyevin təsdiq etdiyi Dövlət proqramına uyğun olaraq Hemofiliya və talassemiyadan əziyyət çəkən uşaqlara qayğı, həmçinin Heydər Əliyev Fondunun “Talassemiyasız həyat naminə” proqramı çərçivəsində “Qan donorloğu, donor seçimi kriteriyaları” adlı maarifləndirici tədbir keçirilib. Tədbirdə Gəncə Dövlət Universitetinin Humanitar məsələlər üzrə prorektoru Gülsüm Fətəliyeva könüllü və təmənnasız qan donorluğuna cəlb edilmə istiqamətində qanvermə aksiyalarının təşkilinin vacibliyindən, həmçinin əhalinin maarifləndirmə tədbirlərinin keçirilməsinin əhəmiyyətindən danışıb.
Daha sonra Respublika Qan Bankı PHŞ Gəncə bölməsinin müdiri Vüsalə Əhmədova çıxış edərək qan donorluğunun əhəmiyyətindən və ehtiyacı olan xəstələr üçün vacibliyini diqqətə çatdırıb. Bildirib ki, çox saylı tədqiqatlarla sübut olunub ki, 400-450 ml qan və ya 500 ml plazma götürmək sağlam insanın səhhətinə və əmək qabiliyyətinə mənfi təsir etmir. Əksinə, təkrar qanvermə qanda şəkərin, zərərli lipoproteinin, qan təzyiqinin, ürək döyüntüsünün azalmasına kömək edir, ürək xəstəlikləri riskini azaldır. Tədbirdə həmçinin tələbələr bu nəcib qan vermə aksiyalarında fəal olmağa çağırılıb.
