Dünyada ölkələr üzrə müəyyən ərazilər var ki, xüsusi qaydalar ilə həmin ərazilərdə siqaret və tütün məhsullarının çəkilməsi qadağan edilir. Azərbaycanda da bu qaydalar sərtləşdirilib. Hətta siqaret çəkilməsi üçün müəyyən məkanlar da fəaliyyət göstərir.
Modern.az-a açıqlamasında vəkil Turan Abdullazadə deyib ki, “Tütün məmulatlarının istifadəsinin məhdudlaşdırılması” haqqında Azərbaycan Respublikasının qanununa əsasən, ölkə ərazisində bəzi ərazilərdə siqaret çəkmək qadağandır. Həmin ərazilərə təhsil-tərbiyə müəssisələri, tibb mərkəzləri, idman yarışları və digər kütləvi yarışların keçirildiyi binalar, restoran, kafe və digər ictimai-iaşə obyektləri, ticarət və məişət obyektləri, sosial-xidmət agentlikləri, teatr, kinoteatr, muzey, kitabxana və digər mədəniyyət mərkəzləri, uşaq meydançaları, yerüstü və yeraltı piyada keçidləri, hava, su, dəmiryol nəqliyyatı, metropoliten, avtobus və taksilər, hava-dəniz limanları, dayanacaqlar və avtovağzallar aid edilir.
Vəkil bildirib ki, bu ərazilərdə tütün istifadə edən vətəndaşlara 30 manat məbləğində cərimə tətbiq edilir. Lakin, bəzi məkanlarda qaydalar daha fərqlidir. Hava məkanında tütün çəkən şəxsə 100 azn, dəmiryolunda 40 azn, avtobus və taksilərdə 50 azn, dəniz-çay nəqliyyatında isə 40 azn məbləğində cərimə edilir. Bu qaydalara riayət etməyən sahibkarlar isə, 500-1000 manat aralığında cərimə edilə bilər.
Zərif Sofiyeva
