Ədalət Partiyasının Ali Məclisinin iclası keçirilib. Partiya sədrinin səlahiyyətlərini icra edən Ali Məclis sədri Meydan Babayev gündəlikdə olan məsələləri elan etdikdən sonra qurultayın vaxtının və nümayəndəlik normasının müəyyənləşdirilməsi, qurultayın keçirilməsi üçün təşkilat komitəsinin yaradılması, partiya daxilində yaranmış vəziyyət və gələcək hədəflərdən bəhs edib. Maraqlıdır ki, sədr müavini Mütəllim Rəhimli bundan öncə mətbuata verdiyi açıqlamalarda Ali Məclisin səlahiyyətlərinin bitdiyini qeyd etmişdi. Buna baxmayaraq, Meydan Babayevin sədrliyilə Ali Məlcis Mütəllim Rəhimlinin partiyadan uzaqlaşdırılması barədə qərar verib.
Modern.az-a açıqlamasında Ədalət Partiyasının sədr müavini Mütəllim Rəhimli bildirib ki, siyasi təfəkkürlü adamların belə addım atmları təəssüf doğurur:
"Bu qərarın heç bir əsası yoxdur, özfəaliyyətdən başqa bir şey deyil. Kimsə oturub qohum-əqrəbasını başına yığıb mənimlə əlaqədar qərar verəcəksə, onun nə təsiri ola bilər? Sadəcə siyasi təfəkkürlü adamların bu cür addım atması təəssüf doğurur. İnsan ona təəssüf edir ki, bizim üçün ali dəyərlər ayaqlar altına atılıb. O toplantıda iştirak edənlərin 90 faizi partiya üzv deyil. Bəzi sifətləri gördüm, onlar indiyə qədər bir neçə partiyanı dağıdaraq ora gəlib çıxıblar. Görünür növbəti missiya Ədalət Partiyasını dağıtmaqdan ibarətdir. Siyasi Şuranın səlahiyyəti aprelin 19-da sonlandırılıb, necə qərar verə bilər? Hətta Siyasi Şuranın səlahiyyəti bitməsə də, onun ən azı 6 üzvü toplanmalıdır ki, qərar verilsin. Amma bunlar ömür boyu 6 üzvü toplaya bilməyiblər. Bu özü də qanunsuzdur. Nizamnamədə göstərilib ki, partiya üzvlüyündən xaric edilməsi məsələsinə rayon təşkilatı baxır. Mənim fəaliyyətimə hansı rayon təşkilatı baxıb? Mən beşinci gün onlarla görüşmüşəm. Bir çox insanların başını aşağı dikdiyini gördüm. Kiminsə sanki təhriki və məcburiyyəti ilə bu addımı atırlar, insanın üzünə də baxa bilmirlər. Mənim ürəyim ağrıdı ki, belə adamlar var".
M.Rəhimli deyib ki, mayın 17-də Ədalət Partiyasının qurultayı keçiriləcək.
"Bütün rayon təşkilatları da bunu bilir və hazırlıq işləri gedir, artıq nümayəndələrin seçilməsi prosesi başlayıb. Bəs bunlar kimi seçəcəklər, qohum-əqrəba ilə partiya olmur axı. Ofisin qıfılını da onlar dəyişiblər və hesab edirlər ki, ofis kimdədirsə, partiyaya nəzarət də ondadır. Təbii ki, gülünc düşüncədir. Ədalət Patiyasının rayon təşkilatları üsyankar əhval-ruhiyyədədir, bunu pisləyir və lənətləyirlər. Bunlar partiyaya yaraşan şeylər deyil və o adamların partiya adından danışmaq haqqı yoxdur. Onlar 3-4 nəfərdirlər, bu haçalanma deyil, sadəcə kiçik bir qopmadır, nə vaxt istəyirlər qopsunlar. Partiyanın rayon təşkilatlarından heç biri bunların yanlarında deyil. Qohumlarını, dostlarını hansısa rayon təşkilatının sədri kimi təqdim edə bilərlər, amma bu ayıbdır. Bizim 20 ildən çoxdur ki, rayon təşkilatının sədrləri, üzvlərimiz var".
M.Rəhimli həmin adamların partiyadan uzaqlaşdırılıb-uzaqlaşdırılamayacağı ilə bağlı məsələyə də toxunub:
"Onların partiyadan kənarlaşdırılması ilə bağlı qərarı mən vermirəm. Bununla bağlı Mərkəzi Nəzarət Təftiş Komissiyası qərarını açıqlayıb, bu cür hərəkətlərə son qoyulması üçün xəbərdarlıq edib. Mənim partiyadan kənarlaşdırılmağımla bağlı qərarı ciddiyə almıram. Sadəcə olaraq gülməyim gəlir ki, sizin həyatda probleminiz Mütəllim Rəhimlidir. Nə etmək istəyirsiniz, başqa işiniz-gücünüz yoxdurmu? Pariyanın minlərlə üzvü var, niyə mənim üstümə düşmüsünüz? Bütün partiya üzvləri buna əsəbi yanaşırlar, amma mən həqiqətən gülümsəyərək baxıram. Onların bu addımını acizlik olaraq görürəm".
