"Azərbaycanın xarici siyasətində Çinlə münasibətlərin dərinləşdirilməsi xüsusi yer tutur. Bu siyasət Azərbaycanın həm regional, həm də qlobal səviyyədə artan rolunun təzahürü kimi qiymətləndirilməlidir."
Bu sözləri Modern.az-a açıqlamasında Milli Məclisin deputat Azər Kərimli deyib.
Deputat bildirib ki, Azərbaycanın Çinə yanaşması, ilk növbədə, qarşılıqlı hörmətə, suverenlik və daxili işlərə qarışmama prinsiplərinə əsaslanır:
"Bu, rəsmi Bakının bütövlükdə beynəlxalq münasibətlər sistemində tutduğu mövqeyə tam uyğundur. Azərbaycan Çinin ərazi bütövlüyünü və "Vahid Çin" prinsipini açıq şəkildə dəstəkləyir, eyni zamanda Pekinin də Azərbaycanın ərazi bütövlüyü məsələsində prinsipial mövqe sərgiləməsini yüksək qiymətləndirir.
Prezident İlham Əliyevin 2025-ci il aprelin 25-də Çinin CGTN telekanalına verdiyi müsahibədə vurğulandığı kimi, Azərbaycan və Çin arasındakı münasibətlər təkcə siyasi və diplomatik səviyyədə deyil, həm də iqtisadi, logistika və nəqliyyat sahələrində strateji əməkdaşlığa söykənir. Azərbaycanın təşəbbüsü ilə reallaşan nəqliyyat layihələri — xüsusən Orta Dəhliz (Transxəzər Beynəlxalq Nəqliyyat Marşrutu) — Çin üçün Avropaya alternativ və daha təhlükəsiz çıxış imkanları yaradır. Bu baxımdan, Azərbaycan Çinlə "Bir kəmər, bir yol" təşəbbüsünün kəsişdiyi mühüm strateji məkandır."
Azər Kərimli vurğulayıb ki, Azərbaycanın regional liderliyi Çinlə tərəfdaşlıq siyasətində də özünü göstərir:
"Bakı qlobal enerji, nəqliyyat və ticarət dəhlizlərinin əsas qovşağına çevrilməyi hədəfləyir və bu istiqamətdə Pekinlə əlaqələri daha da genişləndirməkdə qərarlıdır.
Nəticə olaraq, Azərbaycanın Çinlə münasibətləri təkcə ikitərəfli əlaqələr kontekstində deyil, həm də beynəlxalq sistemdə yeni güc balansının formalaşması fonunda strateji əhəmiyyət kəsb edir. Azərbaycan bu münasibətləri genişləndirərək öz müstəqil xarici siyasət kursunu gücləndirir və regionda dayanıqlı inkişafın əsas oyunçularından birinə çevrilir.
Hazırkı mərhələdə Azərbaycan beynəlxalq hüququn prinsiplərinə — xüsusilə dövlətlərin suverenliyi və ərazi bütövlüyü prinsipinə əsaslanaraq, regionda uzunmüddətli sabitliyin bərqərar olunmasını qarşısına məqsəd qoymuşdur. Müsahibədə də qeyd edildiyi kimi, Azərbaycanın təkidi ilə regionda sərhədlərin dəqiqləşdirilməsi, kommunikasiyaların açılması və qarşılıqlı inamın qurulması istiqamətində ciddi addımlar atılır. Bu, Azərbaycanın regional inteqrasiya və əməkdaşlıq təşəbbüslərində prinsipial mövqeyini bir daha nümayiş etdirir.
Bununla yanaşı, Azərbaycan sülh prosesində birtərəfli kompromisə deyil, qarşılıqlı hüquq və öhdəliklər balansına əsaslanan yanaşmanı müdafiə edir. Rəsmi Bakının təkidlə irəli sürdüyü çağırışlar, bir tərəfdən, region ölkələrinin suveren hüquqlarının tanınmasına, digər tərəfdən isə davamlı və qarşılıqlı faydalı əməkdaşlıq modelinin qurulmasına yönəlmişdir."
Millət vəkilinin sözlərinə görə Azərbaycanın ortaya qoyduğu mövqe bir tərəfli diktəyə deyil, beynəlxalq hüququn norma və prinsiplərinə əsaslanan ədalətli yanaşmaya əsaslanır:
"Bu siyasət, təkcə Azərbaycanın milli maraqlarına deyil, bütövlükdə regionun gələcək inkişaf perspektivlərinə də xidmət edir."
