Övlad dünyaya gətirən hər bir ana böyük risklərlə üz-üzə qalır. Dünyada minlərlə ana və körpə doğuş zamanı və ya doğuşdan sonra həyatını itirir. Bu faciələrin səbəblərinə vaxtında tibbi müdaxilənin olmaması, səhiyyə sistemindəki boşluqlar, qan çatışmazlığı, infeksiyalar və yüksək riskli hamiləliklər aid edilir. Ginekoloqlar xəbərdarlıq edir ki, vaxtında aparılan yoxlamalar, peşəkar və düzgün həkim nəzarəti və doğuş planlaması həm ananın, həm də körpənin həyatını risklərdən azad edə bilər.
Həkim, mama-ginekoloq Suğra Məmmədova Modern.az-a bildirib ki, doğum zamanı ana ölümlərinin baş vermə səbəbləri içində ilk yerdə qanaxmalar dayanır.
“Qanaxma doğuşdan əvvəl (normal və ya aşağıda yerləşmiş ciftin vaxtından əvvəl ayrılması) və ya uşaq doğulduqdan sonra uşaqlıq əzələsinin yığılmaması səbəbindən (atoniya) olur. Ciftin uşaglıq divarına dərin yapışması (qopmaması), qanın laxtalanma sisteminin pozulması, tromboemboliya və s. faktorlar da ana ölümünə səbəb ola bilər”.
Həkim deyib ki, qanaxmanın və ya tromboemboliyanın əvvəlcədən qarşısını alacaq heç bir müalicə metodu yoxdur (bəzi risk qrupu xəstələrinə kleksan - qan durulaşdırıcı təyin olunmasına baxmayaraq tromboemboliya ola bilər) .
Vaxtında və professional yardımı bacaran, təcrübəli həkim olarsa, qanaxmanı saxlamaq üçün bütün tədbirləri edər, lazım gələrsə, 3-5 dəqiqə müddətində qarın boşluğunu açıb art uterinlərə sıxac qoymağı, bir çox tədbirlər görməyi, qanaxma dayanmazsa uşaglığı çıxartmağı bacarmalıdır”.
O qeyd edib ki, buna görə də həkim seçiminə diqqət etmək lazımdır.
“Doğuşu cərrahiyyəni bacaran təcrübəli həkimlərə etibar etmək məsləhətdir. Doğuş prosesi çox vaxt gecələr olduğu üçün yardım briqadasını vaxtında və bir neçə saat əvvəldən yığmaq lazımdır”.
Müsahibimiz deyib ki, körpə ölümü səbəblərinə erkən doğumlar, hipoksiya, göbək ciyəsinin dölün boynuna dəfələrlə dolanması (göbək ciyəsi qısa olarsa təhlükə daha çox), bətndaxili pnevmoniya, doğum dövrünün uzanması, döl başının eyni nöqtədə uzun müddət qalıb əzilməsi, dölün qüsurları və s. ola bilər. Vaxtında müayinə, müalicə və doğuşa yardımın düzgün təşkili bu fəsadların bir çoxunu önləməyə şərait yaradır.
Zərif Sofiyeva
