Gəncə Dövlət Universitetində tələbələrə “Gender stereotipləri və  onların gənclərə  və cəmiyyətə təsiri”  mövzusunda təlim keçirilib.

Gəncə Dövlət Universitetində “Var və Yox” Mədəniyyət və İncəsənət Platformasının təşkilatçılığı ilə  “Gender stereotipləri və onların gənclərə  və cəmiyyətə təsiri” mövzusunda təlim keçirilib. Təlimdə ilk əvvəl Azərbaycan Respublikasının Dövlət Himni səsləndirilib. Daha sonra torpaqlarımızın azadlığı və bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib.

Daha sonra Gəncə Dövlət Universitetinin Humanitar məsələlər üzrə prorektoru Gülsüm Fətəliyeva qonaqları salamlayaraq xalqımızın adət-ənənələrində qadına çox böyük hörmət və qayğı ilə yanaşıldığından danışıb. Prorektor qeyd edib ki, Azərbaycan xalqı tarixən özünəməxsus dəyərlərə, adət-ənənələrə bağlı olan yüksək zəkalı, nəcib və xeyirxah xanımları ilə qürur duyub, ana adını uca tutub, qadına dərin hörmət, ehtiram və məhəbbətlə yanaşıb.

Təlimdə Gender və Media üzrə tədqiqatçı və təlimçi Vəfa Əli iştirakçılara gender stereotiplərinin gənclərin həyat seçimlərinə, sosial münasibətlərə və cəmiyyətin inkişafına təsirini geniş şəkildə izah etdi. Təlimçi eyni zamanda Azərbaycanda aktual sosial problem olaraq qalmaqda davam edən gender-selektiv abort məsələsindən də danışıb. Bildirib ki, gender-selektiv abortların qarşısının alınması Azərbaycan dövlətinin gender bərabərliyi siyasətinin əsas istiqamətlərindən biridir.  Bu məsələni həll etmək məqsədilə Azərbaycan hökuməti 2020–2025-ci illəri əhatə edən “Gender Əsaslı Cins Seçiminin Qarşısının Alınması üzrə Fəaliyyət Planı”nı təsdiq edib.

Təlim interaktiv formatda davam etdi və iştirakçılar diskussiyalarda fəal iştirak etdilər. Gender stereotipləri mövzusunda öz baxış bucaqlarını paylaşdılar.