Ölkənin paytaxtı və digər ərazilərində qida məhsullarının satıldığı bazarlarda təhlükəsizlik qaydalarına yetəri qədər əməl edilmir. Müxtəlif meyvə-tərəvəz, süd, ət və digər kənd təsərrüfatı məhsullarının satıldığı bu məkanlarda nəzarət tədbirləri gücləndirilməlidir.

Azad İstehlakçılar Birliyinin (AİB) sədri Eyyub Hüseynov mövzu ilə bağlı Modern.az saytına açıqlma verib.

Ekspert deyib ki, bazarlar istehlakçıların ən çox aldadıldığı və arzuolunmaz malların satıldığı yerlərdir.

“Bununla yanaşı, onlar həm də ölkəmizdə böyük əhəmiyyət kəsb edən ticarət mərkəzləri sırasındadır. Ölkə ərazisində bütün tələblərə cavab verməyə çalışan bazarlar da vardır. Dünya ölkələrinə də nəzər salsaq, görərik ki, bəzilərində bazarlar mövcuddur, ya da heç yoxdur”.

Eyyub Hüseynov bildirib ki, bazarlarda malların açıq şəkildə satılması Nazirlər Kabinetinin 21.94 saylı qərarının pozulmasıdır. Qərarda deyilir ki, əmtəə bazarında satılan bütün məhsulların üzəri əl dəymədən örtülməlidir. Üzərində istehsal tarixi, yararlılıq vaxtı, istehsalçının adı və s. qeyd olunmalıdır.

O, vurğulayıb ki, bu qaydaların pozulduğunu dəfələrlə görüblər.

“Bu da istehlakçı hüquqlarının pozulması deməkdir. Təəssüflə qeyd etməliyik ki, hələ də bu məsələlər öz həllini tapmayıb. Hətta illər öncə, bazarlarda plastik qablarda turşuların satıldığı da müşahidə olunardı.  Yoxlamaların gücləndirilməsi nəticəsində vətəndaşlar artıq bu hallar ilə tez-tez qarşılaşmırlar.

Qida Təhlükəsizliyi Agentliyi bazarlarda üstü açıq şəkildə üzüm yarpaqlarının kimyəvi maddə ilə qarışdırılaraq, satılmasının da qarşısını alıb. İstehsalçılardan xahiş olunur ki, tez xarab olan və səthi açıq olan məhsullar ya soyuducularda, ya da üstü bağlı formada satılsın”.

Zərif Sofiyeva