Hazırda təhsil ocaqlarının, bir çox iş mərkəzlərinin məhz şəhərlərdə yerləşməsi əhalinin böyük hissəsinin kənddən şəhərə axınına səbəb olur. Nəticədə boşalan kəndlərin sayı çoxalır ki, bu da kənd təsərrüfatının inkişafına mənfi təsir göstərir. Üstəlik, şəhərlərdə tıxac, çirklənmə kimi problemlər baş qaldırır.
Dövlət Statistika Komitəsinin məlumatına görə, 2022-ci ilin əvvəlinə ölkə üzrə əhalinin ümumi sayı 10.215.045 nəfər olub. Bu əhalinin 52,9%-i şəhər, 47,1%-i isə kənd sakinləri kimi qeydə alınıb.
2023-cü ilin əvvəlinə olan məlumata görə, əhalinin ümumi sayı 10.300.000 nəfərdən çox olub. Bu dövrdə əhalinin 54,4%-i şəhər, 45,6%-i isə kənd sakinləri kimi qeydə alınıb.
2025-ci il mart ayının 1-i vəziyyətinə ölkə əhalisinin sayı 10.230.666 nəfər təşkil edib.
Əhalinin 54,4 faizini şəhər, 45,6 faizini kənd sakinləri təşkil edib.
Rəsmi məlumatlar göstərir ki, şəhər əhalisinin nisbəti artıb. Bu da şəhərləşmə prosesinin davam etdiyini göstərir.
Yeri gəlmişən, Bakı Şəhər İcra Hakimiyyətinin başçısı Eldar Əzizov da iki gün öncə Azərbaycanda səfərdə olan İran prezidenti Məsud Pezeşkianla söhbət zamanı ölkə əhalisininin yarısının paytaxtda cəmləşdiyini etiraf edib.
Turizm eksperti Ceyhun Aşurov Modern.az saytına deyib ki, dünyada urbanizasiya (şəhərləşmə) prosesi gedir. Daha yüksək həyat şərtləri, sənayeləşmə insanların şəhərlərə üz tutmalarına səbəb olur. Əsasən də, gənclərin təhsil məqsədilə şəhərə gəlib iş taparaq, geri dönməmələri urbanizasiyaya bariz nümunədir.
Ekspert vurğulayıb ki, köçün əsas səbəblərindən biri rayonlarda əlverişli infrastrukturun olmamasıdır.
“Əlavə olaraq, səhiyyə, təhsil imkanlarının lazımi keyfiyyətdə olmaması da burada xüsusi rol oynayır. Vətəndaşlar daha yaxşı yaşamağa və gəlirli sahələrdə işləməyə çalışırlar. Hətta bəzi şəxslər özlərinə məxsus təsərrüfatlarını sataraq, şəhərə üz tutur”.
Zərif Sofiyeva
