Ermənistan hökuməti Amerikanın “Mercury Public Affairs” lobbiçilik və PR şirkəti ilə müqavilə imzalayıb.
Modern.az xəbər verir ki, bu barədə məlumat 301.am xəbər agentliyi tərəfindən yayılıb.
Bildirilib ki, Xarici Agentlərin Qeydiyyatı Aktı (FARA) çərçivəsində ABŞ Ədliyyə Nazirliyinə təqdim edilən hesabata görə, “Mercury Public Affairs” Ermənistan səfirliyi ilə əməkdaşlığı 2025-ci il aprelin 1-dən başlayıb.
Maraqlıdır ki, sözügedən lobbiçilik və PR şirkətinin daha əvvəl Türkiyənin Vaşinqtondakı səfirliyinin maraqlarını təmsil etdiyi bildirilir.
Müqavilənin şərtlərinə əsasən, şirkət ABŞ-ın strateji və geosiyasi baxımdan mühüm tərəfdaşı kimi Ermənistanı təmsil etmək, Vaşinqtonun Cənubi Qafqazda regional və qlobal maraqlarını inkişaf etdirmək kimi məsləhət xidmətləri üçün ayda 50 min dollar alacaq.
“Mercury Public Affairs” lobbiçilik və PR şirkəti 2018-ci ildən 2020-ci ilin oktyabrına qədər Türkiyə səfirliyi ilə çalışıb. Məlumata görə, İkinci Qarabağ müharibəsi zamanı erməni-amerikan icmasının sərt reaksiyasından sonra şirkət Türkiyə səfirliyi ilə müqaviləni ləğv edib.
Bundan əlavə, şirkət Türkiyənin Xarici İqtisadi Əlaqələr Şurasının (DEİK) nəzdində fəaliyyət göstərən Türk-Amerika İş Şurası (TAİK) ilə 2022-ci ilin yanvar ayına qədər əməkdaşlıq edib.
