Milli Məclisin deputatı Azər Badamov Həştərxan vilayətinə səfəri çərçivəsində Rusiyanın Moskva hava limanında saxlanılıb və bu ölkədən deport olunub. Məsələ ilə bağlı Azərbaycan Xarici İşlər Nazirliyindən verilən açıqlamada Azər Badamovun daxil olduğu nümayəndə heyətinin səfərinin məhz Rusiya Federasiyası Həştərxan vilayətinin vitse-qubernatoru - Hökumət sədri Denis Afanasyevin dəvəti əsasında Azərbaycan xalqının Ümummilli lideri Heydər Əliyevin anadan olmasının 102-ci ildönümü münasibətilə keçiriləcək tədbirlərdə iştirak məqsədilə olduğu qeyd edilib.
Azər Badamovun Rusiyadan deportasiyası Azərbaycan ictimaiyyətinin haqlı narazılığı ilə qarşılanıb.
Olaya Azərbaycandakı müxalifət partiyalarından da reaksiya verilib.
Azərbaycan Demokrat Partiyasının sədri Sərdar Cəlaloğlu Modern.az-a bildirib ki, Azərbaycan tərəfi bu hadisə ilə əlaqədar öz etirazını bildirməlidir:
"Əslinə qalsa, bu hadisə Azərbaycan rəsmisinə qarşı törədilmiş hərəkətdir və diplomatik skandal hesab olunmalıdır. Bir ölkənin parlamentarisinin başqa dövlətin deputatının onun ölkəsinə və rəhbərinə qarşı təhqiramiz çıxışlarına cavab verməsinə görə, bu cür addımın atılması beynəlxalq təcrübədə yolverilməzdir. Təbii ki, Azərbaycan tərəfi bununla bağlı öz etirazını bildirməlidir. Rusiyanın hərəkətinə paralel Rusiyadan ölkəmizin əleyhinə çıxış edən adamların Azərbaycana buraxılmaması üçün konkret addımlar atılmalıdır".
S.Cəlaloğlu Azərbaycan nümayəndə heyətinin də yanlışlığa yol verdiyini düşünür:
"Azər Badamovun Həştərxana buraxılmamasına etiraz əlaməti olaraq onunla yola çıxanlar gərək səfərlərini yarıda qoyub geri qayıdaydılar. Amma təəssüf ki, bunu etməyiblər. Bu daha ciddi aksiya olardı və bəlkə də, problemin müsbət mənada həllinə də yardım göstərərdi".
Azərbaycan Xalq Partiyasının sədri Pənah Hüseyn söyləyib ki, bu addımı düşmənçilik kimi də dəyərləndirmək olar:
"Bu, əlbəttə, Xarici İşlər Nazirliyinin məlum açıqlamasında da deyildiyi kimi, dost olmayan hərəkətdir. Hətta bunu düşmənçilik kimi də dəyərləndirmək olar. Düzdür, Azərbaycanın da Rusiyanın bir sıra deputatlarına qarşı məlum sanksiyaları var. Ermənipərəst, Azərbaycan əleyhinə çıxışlarına görə deputat Konstantin Zatulinin Azərbaycana gəlişinə qadağa qoyulub. Digər deputat Nikolay Valuyev Azərbaycan xalqı əleyhinə təhqiramiz ifadə işlətdiyinə görə onun da barəsində oxşar sanksiya tətbiq olunub. Amma mən bunun xüsusi olaraq Rusiyanın və Azərbaycanın siyasi münasibətlərini dramatikləşdirəcəyi qənaətində deyiləm. Yəni hər halda Rusiya Xarici İşlər Nazirliyi rəsmən açıqlama verir ki, bu, Milli Məclis üzvünün guya Rusiyafob çıxışlarına görədir".
Pənah Hüseyn bu cavabın adekvat olmadığını hesab edir:
"Mən hesab edirəm ki, bu adekvat cavab deyil. Çünki həqiqətən həmin şəxslərin Azərbaycana qarşı çıxışları ilə Azər Badamovun məlum çıxışı arasında əhəmiyyətli dərəcədə fərq var. Üstəlik Azərbaycan tərəfi bunu rəsmən elan etmişdi. Lakin Azər Badamovun başına gələn hadisə Moskva Hava Limanında qəflətən baş verib. Bu nə normal münasibətlərə, nə də diplomatik etiketə uyğundur".
Ağ Partiyanın sədri Tural Abbaslı isə qeyd edib ki, Azər Badamov olayı iki dövlət arasında nisbətən yumşalmağa başlayan münasibətlər üçün bir təhdiddir:
"Mən də düşünürəm ki, bu, Rusiya tərəfindən Azərbaycana qarşı dost olmayan hərəkətdir. Eyni zamanda, iki dövlət arasında nisbətən yumşalmağa başlayan müünasibətlər üçün bir təhdiddir. Təyyarə krizindən sonra Rusiya bir sıra addımlar atdı və Azərbaycan-Rusiya münasibətləri yumşalmağa başladı. Azərbaycan Respublikasının deputatı kim olur-olsun, qanunvericilik orqanının təmsilçisidir və rəsmi nümayəndə heyətinin tərkibində Rusiyaya gələn bu şəxsi aeroportda adi vətəndaş kimi saxlayıb deport edə bilməzsiniz. Çünki bu həm diplomatik münasibətlər sisteminə, həm də beynəlxalq diplomatiyaya ziddir. Azər Badamov haqda bu və ya digər səbəbə görə tutaq ki, "arzuolunmaz şəxs" statusu tətbiq edilib, ölkəyə girişi qadağan olunubsa, bu zaman qərar barədə Azərbaycanın müvafiq qurumlarına əvvəlcədən məlumat verilməliydi. Belə məlumat açıqlansaydı Azər Badamov hər hansı nümayəndə heyətinin tərkibində və ya təkbaşına ora getməzdi. Heç bir xəbərdarlıq yoxdur və diplomatik pasporta malik deputatımız Moskvaya gedir, ona deyirlər ki, sizin Rusiyaya daxil olmaq haqqınız yoxdur, geri qayıdın. Bu hörmətsizlikdir. Millət vəkili və diplomatik pasporta malik olmayan şəxs olsa, hətta onu saxlaya bilərdilər. Xatırlayırsınızsa, bir vaxtlar idmançı Kamil Zeynallını guya ki, Ermənistan tərəfinin tələbilə saxlamışdılar. Azərbaycan dövlətinin sürətli müdaxiləsindən sonra bu kriz aradan qalxdı".
Tural Abbaslının fikrincə, buna missilləmə ilə cavab verilməlidir:
"İndi necə olsun, biz bütün Rusiya deputatlarının Azərbaycana girişini qadağan edək və ya siyahını verməyək, gələndə onları hörmətsizcəsinə geri qaytaraq? Onsuz belə də olmalıdır. Diplomatik məsələlərdə misilləmə, güzgü effekti var. Onlar bizə necə davranırsa, elə də reaksiya verilməlidir. Sual oluna bilər ki, Azərbaycan Rusiyanın hansı şəxslərini "qara siyahı"ya salıb, "arzuolunmaz şəxs" elan edib? Azərbaycan tərəfi bu siyahını həm mediaya açıqlayır, həm də Rusiyanın aidiyyəti orqanlarına göndərir.
Güman edirəm ki, Xarici İşlər Nazirliyimiz Rusiyanın aidiyyəti qurumlarından bu hadisə ilə bağlı açıqlama tələb edər. Rusiya hələ də sivil dünyanın tərkib hissəsi olduğunu göstərmək istəyirsə, bu məsələyə görə üzrxahlıq etməlidir".
Müsavat Partiyasının sədr müavini Gülağa Aslanlı isə sorğumuza belə cavab verib:
“Azərbaycan tərəfi Moskvada keçiriləcək 9 may paradında iştirakdan imtina etməyin yollarını axtarıb tapmalıdır”.
