Aprelin sonu və mayın əvvəlində yaz fəslinə uyğun olmayan güclü yağış həm şəhər həyatına, həm də kənd təsərrüfatına təsirsiz ötüşməyib. Havanın daim dəyişkən, yağıntıların normadan artıq olması bahar üçün anormal hesab edilir.
Modern.az-a açıqlamasında Heydər Əliyev adına Coğrafiya İnstitutunun İqlim və aqroiqlimşünaslıq şöbəsinin elmi işçisi, akademik Rafiq İsmayılov deyib ki, dünyada baş verən qlobal iqlim dəyişmələri ölkə ərazisində də öz təsirini göstərir. Belə ki son illər ölkə ərazisində havanın kəskin soyuması və ya isinməsi normadan artıq olub:
"Ümumiyyətlə belə hallar fəsillərin dəyişmə dövründə (keçid vaxtlarında) daha qabarıq şəkildə hiss edilir. Aprel, may ayları da bu zaman kəsiyinə düşdüyü üçün belə hallar mümkündür və hər zaman ehtimalı gözləniləndir".
Ekspertin fikrinə görə, şimal və qərb istiqamətdən ərazimizə daxil olan soyuq hava kütlələri və troposferdə baş verən sinoptik proseslər belə anomalların yaranmasına səbəb olur:
"Nəticədə yağıntıların düşməsi və onların normadan artıq olması ehtimalları da az olmur. İqlim dəyişmələri institumuzun və tədqiqatlarımızın nəticəsi olaraq , bildirir ki, ən çox dəyişmələr məhz soyuq dövrlərdə daha kəskin xarakter daşıyır. Beləliklə dövrlərin uzanması və bizim öyrəşdiyimiz isti keçən günlər bir az 3-5, bəzi yerlərdə 10-12 gün yerdəyişməsi mövcuddur (yəni yay aylarına daxil olmuşdur)".
Rafiq İsmayılov vurğulayıb ki, yağıntının davam etməsi yox, onun intensivliyinin artması və ya azalması bəzi aylarda gözlənilən iqlim normalarında artıq yaxud az miqdarda düşməsi heç şübhəsiz iqlim dəyişmələri ilə bağlı prosesdir. İqlimin dəyişməsi təbiətin qanunlarına təsirsiz ötüşmür. Hava, su, torpaq, istilik daxilində qeyri-normal dəyişiklərin olması ilk olaraq, insanın gündəlik həyatına mənfi təsir göstərir.
Zərif Sofiyeva
