Müstəqilliyini bərpa etdikdən sonra Azərbaycanın ilk daxil olduğu qurumlardan biri İqtisadi Əməkdaşlıq Təşkilatıdır (ECO) və onun fəaliyyətinə böyük önəm verib.
Modern.az xəbər verir ki, bunu "Report"a açıqlamasında Milli Məclisin deputatı Müşfiq Cəfərli deyib.
O qeyd edib ki, təşkilatın bütün üzv ölkələrini həm ortaq tarix, həm də iqtisadi və siyasi maraqlar birləşdirir:
"Dövlətimiz ECO üzvü olaraq bir çox sahələrdə əməkdaşlığın inkişafı məqsədilə təklif və təşəbbüslərlə çıxış edib. Bakı 2006 və 2012-ci illərdə ECO Zirvə Toplantılarına ev sahibliyi etmiş, bu tədbirlərdə qəbul olunmuş sənədlərdə üzv ölkələr arasında bir sıra sosial-iqtisadi və siyasi əlaqələrin əsas prinsipləri, regional münasibətlərin prioritetləri, istiqamətləri öz əksini tapıb.
2012-ci il oktyabrın 16-da Bakıda İqtisadi Əməkdaşlıq Təşkilatının 12-ci Zirvə görüşü keçirilib. Zirvə toplantısının yekununda Bakı bəyannaməsi qəbul edilib".
M.Cəfərlinin sözlərinə görə ECO-ya üzv dövlətlər 2020-ci ilə qədər mövcud olan Azərbaycan-Ermənistan Dağlıq Qarabağ münaqişəsinə konkret münasibət bildirib, beynəlxalq normalara qarşı çıxaraq Azərbaycanın ərazi bütövlüyünü pozan Ermənistana tənqidi yanaşıb və ölkəmizin maraqlarını haqlı olaraq müdafiə ediblər:
"2021-ci il noyabrın 28-də Türkmənistanın paytaxtı Aşqabad şəhərində keçirilən İqtisadi Əməkdaşlıq Təşkilatının XV Zirvə Toplantısında Prezident İlham Əliyev iştirak etmişdi. Demək olar ki, ECO-nun Aşqabadda keçirilən Zirvə görüşünü Azərbaycan üçün olduqca uğurlu qiymətləndirmək olar. Zirvə görüşündə qəbul edilmiş “Aşqabad fəaliyyət konsensusu” adlı yekun bəyannamə Azərbaycanın maraqlarınə müdafiə edən müddəalar da yer alır.
İqtisadi Əməkdaşlıq Təşkilatı çərçivəsində qəbul edilən hesabatlarda “dəhliz” anlayışı “Azərbaycan, Rusiya və Ermənistan liderlərinin imzaladığı sənədlər” kontekstində öz əksini tapıb. Bakının uğurlu xarici siyasətinin nəticəsi olaraq bu mümkünləşib. Bu isə Azərbaycan Prezidentinin təklif etdiyi “3+3” əməkdaşlıq formatına digər İƏT ölkələrinin də qoşulma şansını artırır".
