Gəncə Dövlət Universiteti və YAP Gəncə şəhər təşkilatının birgə təşkilatçılığı ilə Ümummilli Lider Heydər Əliyevin anadan olmasının 102-ci ildönümünə həsr olunan elmi-praktik konfrans keçirilib. Gəncə Dövlət Universitetinin beşinci tədris korpusunda təşkil edilən konfransda öncə iştirakçılar Ulu Öndər Heydər Əliyevin büstü önünə gül dəstələri düzüblər, dahi şəxsiyyətin ruhunu hörmətlə anıblar.
Daha sonra öz işinə başlıyan konfransda Azərbaycan Respublikasının Dövlət Himni səsləndirilib, Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad olunub.
Konfransda həmçinin Ulu Öndər Heydər Əliyevin zəngin siyasi fəaliyyətinə həsr olunan videoçarx nümayiş etdirilib.
Gəncə Dövlət Universitetinin rektoru Yusif Yusibov konfransda giriş sözü ilə çıxış edərək Ulu Öndər Heydər Əliyevin çoxşaxəli fəaliyyətindən, Azərbaycanın inkişafı və milli dövlətçiliyin gücləndirilməsi istiqamətində misilsiz tarixi xidmətlərindən və böyük xilaskarlıq missiyasından danışıb. Rektor qeyd edib ki, Ümummilli Lider Heydər Əliyev öz xalqını zamanın mürəkkəb tarixi-siyasi sınaqlarından uğurla çıxarıb və ardıcıl mübarizə apararaq onu müstəqilliyə qovuşduran qüdrətli şəxsiyyətdir. Məhz elə buna görə də Ümummilli Lider Heydər Əliyevin əziz xatirəsi daima qəlblərimizdə yaşayacaqdır. Daim azərbaycanlı olması ilə fəxr edən Ümummilli Lider Heydər Əliyevin ruhu şaddır. Çünki xilaskarı olduğu müstəqil Azərbaycanın ərazi bütövlüyü onun ideya və əməllərini davam etdirən Prezident, Müzəffər Ali Baş Komandan İlham Əliyevin rəhbərliyi ilə bərpa edilib. 30 ildən bəri düşmən əsarətində olan Qarabağ əbədi azadlığına qovuşub. Aparılan uzaq görən və uğurlu siyasət nəticəsində tez bir zamanda tarixi torpaqlarımız olan Qərbi Azərbaycana da soydaşlarımızın qayıdışı təmin ediləcəkdir.
YAP Gəncə şəhər təşkilatının sədri Bayram Aslanov “Ulu Öndər Heydər Əliyev müstəqil Azərbaycan dövlətinin qurucusu və memarıdır” adlı məruzəsində diqqətə çatdırıb ki, 1993-cü ildə xalqın təkidli tələbi ilə Ümummilli Lider Heydər Əliyevin hakimiyyətə gəlməsi müasir tariximizdə dönüş nöqtəsi oldu. Ulu Öndər Heydər Əliyev Azərbaycana müstəqillik, dövlətçilik, suverenlik və milli-mənəvi dəyərlərə qayıdışı bəxş etdi. Ölkədə sülh və sabitlik bərqərar olundu, ordu quruculuğuna, iqtisadi inkişafa şərait yaradıldı, təhsilin və mədəniyyətin yüksəlişi təmin edildi. Ulu Öndər Azərbaycanı tənəzzüldə olan dövlətdən inkişaf edən ölkəyə çevirdi. Ölkəmizin beynəlxalq nüfuzu sürətlə yüksəldi.
Universitetin Elm və innovasiyalar üzrə prorektoru, Millət vəkili Pərvin Kərimzadə “Azərbaycan müstəqillik illərində: Qurtuluşdan Zəfərə” adlı çıxışında Ulu Öndər Heydər Əliyevin xalqımız və dövlətimiz qarşısındakı misilsiz xidmətlərindən, eyni zamanda dahi rəhbərin siyasi irsinin gələcək nəsillər üçün əhəmiyyətindən söz açıb. Bildirib ki, Ümummilli Lider Heydər ƏIiyevin Azərbaycanın tərəqqisinə xidmət edən səmərəli dövlətçilik siyasəti bu gün möhtərəm Prezidentimiz cənab İlham Əliyev tərəfindən yüksək əzmkarlıq və yaradıcılıqla davam etdirilir. Ölkəmiz beynəlxalq münasibətlər məkanında liderlik mövqeyində dayanıb. Artıq Azərbaycanın dünəni və bugünü ilə yanaşı, gələcəyi, rifahlı sabahı da tam təmin edilib.
Sosial fənlər kafedrasının müdiri, dosent Cavid Bağırzadə isə “Azərbaycanı dünyaya tanıdan lider” adlı məruzəsində vurğulayıb ki, Ümummilli Lider Heydər Əliyev siyasi fəaliyyəti boyu inkişaf edən, milli dəyərləri ilə tanınan, xarici dövlətlər arasında özünə layiqli yer tutan güclü Azərbaycan naminə böyük əzmlə çalışıb. Dönməz prinsipləri, misilsiz tarixi xidmətləri ilə adını dünyada ən nüfuzlu liderlər cərgəsinə daxil edib. Millətin məhəbbətini qazanan Ümummilli Lider Heydər Əliyev Azərbaycan xalqının yaddaşında qurucu və xilaskar dövlət xadimi kimi əbədi olaraq yaşayacaqdır.
Konfransda Kimya-biologiya fakültəsinin tyutoru Lalə Ələkbərovanın “Ulu Öndər Heydər Əliyev ideyaları işığında”, Fizika və texniki fənlər fakültəsinin birinci kurs tələbəsi Ülviyyə Məmmədlinin “Heydər Əliyev və Azərbaycan gəncliyi” adlı məruzələri dinlənilib. Filologiya fakültəsinin dördüncü kurs tələbəsi Nigar Məmmədova isə “Heydər” şerini söyləyib.
Konfransda Humanitar məsələlər üzrə prorektor, dosent Gülsüm Fətəliyeva sonda çıxış edərək Azərbaycanın hərtərəfli tərəqqisi yolunda böyük tarixi xidmətlər göstərən, dövlət müstəqilliyinin və təhlükəsizliyinin qorunmasına əvəzsiz töhfələr verən Ulu Öndər Heydər Əliyevin vətənə sədaqət, xalqa fədakarlıqla xidmət nümunələrindən bəhz edib. Prorektor nəzərə çatdırıb ki, xalqımız Ümummilli Lider Heydər Əliyevin əziz xatirəsini daim ehtiram və minnətdarlıqla yad edir.
