Ukrayna prezidenti Vladimir Zelenski mayın 8-də axşam amerikalı həmkarı Donald Trampla apardığı söhbəti “yaxşı, çox isti və konstruktiv” adlandırıb.

Modern.az xəbər verir ki, Zelenski özünün Teleqram kanalında dərc olunan açıqlamasında bildirib ki, tərəflər iqtisadi tərəfdaşlıq sazişi, Rusiya ilə müharibəyə son qoymaq üçün addımlar və Kiyevlə Moskva arasında potensial danışıqlar məsələlərinə toxunublar.

Ukrayna prezidentinin sözlərinə görə, tərəflər xalqları nasizm üzərində qələbə münasibətilə təbrik ediblər.

Zelenski həmçinin bildirib ki, tərəflər iqtisadi tərəfdaşlıq sazişinin mayın 8-də Ali Rada tərəfindən ratifikasiya olunmasını alqışlayıblar. Ukrayna prezidenti bunu “əməkdaşlıq üçün bir çox yeni imkanlar açan tarixi sənəd” adlandırıb.

Bundan əlavə, Zelenski və Tramp “sülh üçün əlavə səylərin, xüsusən də atıla biləcək konkret addımların zəruriliyini” müzakirə ediblər.

"Prezident Tramp döyüş meydanındakı vəziyyətlə maraqlandı, mən də ona məlumat verdim", - Ukrayna prezidenti bildirib.

Ukrayna prezidenti həmçinin deyib ki, onun ölkəsi bu gündən belə 30 günlük atəşkəsə hazırdır.

"Bu, diplomatiya üçün çox şans verə biləcək bir şeydir. Ukrayna bu dəqiqədən 30 günlük sükut üçün tam atəşkəsə hazırdır. Nə raket zərbələri, nə pilotsuz təyyarələrin hücumu olsun, nə də cəbhədə yüzlərlə əsgər ölsün", - deyə Ukrayna prezidenti bildirib.

O, Rusiyanın belə bir təklifə razılıq verəcəyi gözləntisindən danışıb.

"Onlar müharibəni bitirməyə hazır olduqlarını sübut etməlidirlər. Və bu, birinci dəfə deyil - biz təklif edirik. 30 gün sülh illərinin başlanğıcı ola bilər. Məhz atəşkəs uzunmüddətli və etibarlı sülhə doğru hərəkətin əsl göstəricisi ola bilər. Amerika bu işdə kömək edə bilər. Dünyanın Amerikaya 80 il əvvəl olduğu kimi ehtiyacı var".

“Birgə hərəkətləri”dən danışarkən, Zelenski “Rusiyaya təzyiq – sülh naminə təzyiq” məsələsində ABŞ-ın dəstəyi mövzusunu qaldırıb və tərəflər “diplomatik işi” də müzakirə ediblər.

Ukrayna prezidentinin sözlərinə görə, həqiqi və uzunmüddətli atəşkəs – ən azı 30 gün - diplomatiya üçün çoxlu şanslar verə bilər.

"Mən də təsdiqlədim ki, Ukrayna istənilən formatda danışıqlara hazırdır. Lakin bunun üçün Rusiya tam və qeyd-şərtsiz atəşkəsdən başlayaraq müharibəni bitirmək niyyətinin ciddiliyini nümayiş etdirməlidir", - deyə Zelenski bildirib.

Onun sözlərinə görə, Tramp “bu müharibənin bitməsini istədiyini, kömək etməyə hazır olduğunu və atəşkəs zərurətini dəstəklədiyini” təsdiqləyib.

Zelenski əlavə edib ki, amerikalı həmkarı ilə birlikdə bundan sonra da təmas qurmaq haqqında razılığa gəliblər.

A.Qorxmaz