Azərbaycanın çağdaş tarixini Ümummilli Lider Heydər Əliyevin dövlətçilik ideyaları, strateji baxışı və xalqına bağlılığı olmadan təsəvvür etmək mümkün deyil. O, hələ SSRİ dövründə Azərbaycan rəhbərliyinə gəldiyi ilk günlərdən etibarən milli kimliyin qorunması, iqtisadi və mədəni inkişafın təmin olunması, eləcə də xalqın gələcək müstəqilliyinə zəmin yaratmaq istiqamətində əvəzsiz xidmətlər göstərmişdir. SSRİ-nin tərkibində olan Azərbaycanın həyatında iqtisadiyyatdan hərbi quruculuğa, enerji siyasətindən təhsilə qədər bir çox sahədə görülən mühüm işlər, bu günün qalib və suveren Azərbaycanının təməllərini qoymuşdur.
Əsl müstəqillik və azadlıq iti zəka, qətiyyət, cəsarət və yüksək liderlik tələb edir. Heydər Əliyev bütün bu keyfiyyətləri özündə birləşdirən nadir tarixi şəxsiyyət idi. Zaman keçdikcə onun böyüklüyü daha aydın görünür – çünki bu gün müstəqil Azərbaycan dövlətinin uğurla inkişaf edən yolu məhz Ulu Öndərin müəyyən etdiyi strateji kursun nəticəsidir.
Heydər Əliyevin milli-mənəvi dəyərlərə bağlılığı, xalqının tarixi və mədəni irsinə dərin hörməti azərbaycançılıq ideyasının dövlət siyasətinə çevrilməsində mühüm rol oynadı. Bu ideya bu gün də Azərbaycanda yaşayan bütün etnik və dini qrupları vahid vətən ətrafında birləşdirən mənəvi platformadır.
Ulu Öndərin Dünya Azərbaycanlılarının I Qurultayında söylədiyi "Mən həmişə fəxr etmişəm, bu gün də fəxr edirəm ki, mən azərbaycanlıyam!" fikri təkcə emosional bir bəyanat deyil, həm də xalqına ünvanlanmış milli dirçəliş çağırışı idi. Torpaqlarının bir hissəsi işğal altında olan, beynəlxalq ədalətsizliklə üz-üzə qalan bir xalq üçün bu sözlər ruh yüksəlişi, milli birliyin və özünəinamın simvoluna çevrildi.
Heydər Əliyevin xidmətləri o qədər əhatəli və fundamental xarakter daşıyır ki, onillər və yüzillər keçsə də, gələcək nəsillər onu Azərbaycan xalqının xilaskarı, görkəmli dövlət xadimi və böyük azərbaycanlı kimi xatırlayacaq. Onun həyatı və fəaliyyəti Azərbaycan dövlətçiliyinin ayrılmaz bir parçasına çevrilmişdir.
Bu gün biz öz torpağında, öz bayrağı altında qalib xalqın nümayəndəsi kimi yaşayırıq. Bu tarixi nailiyyətin əsasında Ulu Öndərin qoyduğu möhkəm təməllər, müdrik siyasəti və onun layiqli davamçısı, Müzəffər Ali Baş Komandan İlham Əliyevin əzmkarlığı dayanır. Heydər Əliyevin xatirəsi yalnız tarixi şəxsiyyətin anımı deyil, həm də müstəqil dövlətin ruhunu yaşadan ideologiyanın davamıdır.
Onun xilaskarlıq missiyası bu gün də hər bir azərbaycanlının qəlbində minnətdarlıqla anılır. Çünki Ulu Öndər tarixə sadəcə lider kimi deyil, bir xalqın taleyini dəyişən şəxsiyyət kimi düşüb.
Azər Kərimli
Milli Məclisin deputatı
