Ermənistanda 44 günlük müharibə ilə bağlı növbəti cinayət işi məhkəməyə göndərilib.

Modern.az xəbər verir ki, İstintaq Komitəsi müəyyən edib ki, hərbi hissənin komandiri, polkovnik Artur Ohanyan 2020-ci il oktyabrın 6-dan oktyabrın 7-dək olan müddətdə xidməti vəzifələrinin icrasına səhlənkar münasibət göstərib, onları lazımınca yerinə yetirməyib ki, bu da ağır nəticələrə səbəb olub.

Bundan başqa, polkovnik Ohanyan 2020-ci il oktyabrın 6-da komandanlıqdan Horadiz şəhərinin qərb hissəsində yerləşən Lələtəpə istiqamətində hücuma başlamaq və qırılmış müdafiə xəttinin bərpası barədə əmr alsa da, onu yerinə yetirməyib.

İstintaq zamanı müəyyən edilib ki, N saylı hərbi hissənin tabor komandiri polkovnik-leytenant Q.A. 2020-ci il oktyabrın 7-də tabeliyində olan şəxsi Lələtəpə istiqamətində hücuma keçməyə məcbur olub. Lakin mövcud silah və sursat itkilərini hesablamaq bəhanəsi ilə döyüş tapşırığını davam etdirməkdən imtina edib.

Q.A. taborun şəxsi heyətinə təyin olunmuş marşrutdan kənara çıxmağı əmr edib, yuxarı komandanlıqla əlaqə saxlamaq təklifini rədd edib. O, daha sonra komandanlığın icazəsi olmadan bütün taborun şəxsi heyətinə əks-hücuma davam etmədən geri qayıtmağı əmr edib.

Polkovnik Artur Ohanyanın sabiq müdafiə naziri, deputat Seyran Ohanyanın oğlu olduğu bildirilir.



A.Qorxmaz