Dekorativ ev bitkilərindən insanların olduğu məkanlarda ətrafı canlandırmaq, müsbət aura yaratmaq üçün geniş istifadə olunur. Belə bitkilər və güllər havanın təmizliyi, məkanlar üçün estetik görünüş yaratmaq məqsədilə evlərə, ofislərə yerləşdirilir. Lakin bir çoxları bilmədən dekorativ bitkilərin seçimi zamanı səhvlərə yol verirlər. Nəticədə həm öz sağlamlıqlarını, həm də ailə üzvlərinin, xüsusilə də uşaqların səhhətini riskə atırlar. Bu səbəbdən evlər üçün güllər seçərkən yalnız görünüşə deyil, onların insan orqanizminə təsirinə də xüsusi diqqət yetirilməlidir.

Bioloq Elşad Şükürov Modern.az-a bildirib ki, insanların böyük qismi dibçək güllərindən yalnız estetik görüntü və oksigen mənbəyi üçün istifadə edir. Amma çox adam belə bitkilərin hansı riskləri daşıdığı haqqında məlumata malik deyil.

O deyib ki, dibçəkdə yetişdirilmiş ev bitkilərinin bəzilərində zəhərli maddələr toplanır. Bu maddələr əsasən, bitkilərin yarpaqları, şirəsi və gövdəsində yaranır. Dekorativ cəhətdən göz oxşasa da, bu cür güllər bir müddət sonra xüsusilə də körpə və azyaşlı uşaqların orqanizminə mənfi təsir göstərir.

Bioloq söyləyib ki, bitkilərin zəhərli maddələri, ətrafa yaydığı tozcuqlar, qoxusu bəzi şəxslərdə kəskin allergiyaya səbəb olur. Həmin insanlarda öskürək, asqırma, göz yaşartıları, qızartılar, dəridə səpgilər, qaşınmalar əmələ gəlir.

“Lakin elə bitkilər var ki, onlar ancaq heyvan və uşaqlarda daha təhlükəli problemlər yaradır. Ev pişiyi, iti, toyuq-cücə kimi heyvan və quşların belə bitkiləri təsadüfən udması, çeynəməsi sayəsində zəhərlənmə riski yaranır. Həmçinin, bitkinin əkildiyi dibçək, torpaq həddən artıq rütubətli ola bilər. Bu da kiflənməyə və kif göbələklərinin ətrafa yaydığı sporlar ilə havanın zəhərlənməsinə gətirib çıxara bilər”, -deyə, ekspert vurğulayıb.

Onun sözlərinə görə, dekorativ bitki almaq istəyən onlar haqqında məlumata malik olmalıdır. Xüsusilə də bitkilərin mənfi təsirləri, yaratdığı problemlər öncədən araşdırmalıdır. Belə bitkilərdən istifadə edərkən əllər, bədənin dəyildiyi yerlər təmiz yuyulmalıdır. Ələxsus körpə uşaqlı ailələr, ev heyvanı saxlayan vətəndaşlar zəhərli bitkilərdən uzaq durmalıdır. Alınacaq dibçək güllərinin saxlanıldığı yerlər və rütubət şəraiti də düzgün müəyyən edilməlidir ki, təhlükə mənbəyi olan bakteriyalar, göbələklər yaranmasın.

Bəs hansı güllər ev şəraiti üçün zəhərli sayılır:

Bioloq qeyd edib ki, bu gün satışda olan bitkilər arasında estetik görüntüsü ilə seçilən, amma zəhərli olanlara aşağıdakılar daxildir:

Dieffenbachia (Ağlayan gəlin, Dumb cane) - onun yaratdığı fəsadlar: ağızda, dildə və boğazda yanma, şişkinlik, udqunma və danışma çətinliyi;

Philodendron - ağız və boğaz qıcıqlanması, mədə ağrısı, ürəkbulanma;

Oleander (Zeytunçiçəyi) - ciddi ürək ritm pozğunluğu, ürəkbulanma, ölüm riski (çox nadir);

Peace Lily (Sülh zanbağı) - kalsium oksalat kristalları səbəbilə ağızda yanma, tüpürcək artımı;

Pothos (Scindapsus) - ağızda və boğazda yanma, qıcıqlanma və s.

Zəhərsiz bitkilər sırasında isə Areka palm, Spider plant, Calathea və s. geniş yayılıb.

Zərif Sofiyeva