Azərbaycanın Tehrandakı səfirliyinə hücum edən şəxsin - Yasin Hüseynzadənin edam cəzası bu gün səhər saatlarında icra edilib.
Xatırladaq ki, 27 yanvar 2023-cü il tarixində Azərbaycanın Tehrandakı səfirliyinə hücum edən İran vətəndaşı Yasin Hüseynzadə “Kalaşnikov” markalı avtomat silahla mühafizə xidmətinin rəisi Orxan Əsgərovu qətlə yetirib.
Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıblar.
“Edam hökmünün icrasına görə Prezident İlham Əliyevə minnətdaram”
Modern.az-a danışan şəhid Orxan Əsgərovun atası Rizvan Əsgərov edam hökmünün icrasına görə Prezident İlham Əliyevə təşəkkürünü bildirib.
“Əvvəla mən edam hökmünün icrasına görə cənab Prezident İlham Əliyevə təşəkkürümü bildirirəm. Onun qəti mövqeyi olmasa, bu edam baş tutmazdı. Azərbaycanın İrandakı səfriliyi də çox işlər gördü. Şübhəsiz ki, onun edam olunması mənim oğlumu geri qaytarmr. Sadəcə olaraq təskinik tapırıq ki, heç olmasa, oğlumun qatili öz layiqli cəzasını aldı", - R.Əsgərov deyib.
Xatırladaq ki, Orxan Əsgərov Bakıdakı İkinci Şəhidlər xiyabanında dəfn edilib. 3 fevral 2023-cü ildə Azərbaycan Prezidentinin Sərəncamı ilə Orxan Rizvan oğlu Əsgərov (ölümündən sonra) "Vətən uğrunda" medalı ilə təltif edilib.
