Prezident İlham Əliyevin sərəncamı ilə əfv edilənlərdən biri də Xalidə İsgəndərovadır.
Modern.az-ın məlumatına görə, Xalidə İsgəndərova 2016-cı ildə Bakı Ağır Cinayətlər Məhkəməsinin hökmü ilə 18 il müddətinə azadlıqdan məhrum edilib.
O, həyat yoldaşı, uzun illər Daşınmaz Əmlak üzrə Dövlət Reyestri Xidmətinin rəis müavini olan Füzuli İsgəndərovun qətlində təqsirli bilinib. Onun həm də sabiq maliyyə naziri Əvəz Ələkbərovun xalası oğlu olduğu bildirilir.
Füzuli İsgəndərov 2014-cü il sentyabrın 1-də – qızı Bülbülün toyundan üç gün sonra yaşadığı evə bitişik qarajda qətlə yetirilib. F.İsgəndərovun həyat yoldaşı Xalidə İsgəndərova 2015-ci il aprelin 29-na qədər bu iş üzrə zərərçəkmiş qismində tanınsa da, sonradan o, qətldə ittiham edilərək məsuliyyətə cəlb edilib.
Xalidə Isgəndərova isə ittihamları qəbul etməyib və həyat yoldaşını maskalı şəxsin qətlə yetirdiyini bildirib. Onun sözlərinə görə, həmin şəxs toyun pullarını almaq üçün Füzuli İsgəndərovdan sonra ona və həmin vaxt evdə olan azyaşlı qızı Əmanəyə də hücum edib və bıçaqla xəsarət yetirib.
Ancaq istintaq və məhkəmə F.İsgəndərovun həyat yoldaşı tərəfindən qətlə yetirlidiyi qənaətinə gəlib.
Əfv sərəncamına əsasən, onun həbs müddəti yarıyadək endirilib.
