Bakı Mühəndislik Universitetində (BMU) Xarici dillər kafedrasının təşkilatçılığı ilə ingilis bölümlərində təhsil alan tələbələrin ifasında dünya ədəbiyyatının görkəmli klassiklərindən Ceyn Ostinin “Qürur və qərəz” tamaşası nümayiş etdirilib.
Modern.az xəbər verir ki, əvvəlcə kafedranın müdiri Nərminə Əliyeva çıxış edərək, layihənin tələbələrin ingilis dili biliklərinin təkmilləşdirilməsinə, yaradıcılıq qabiliyyətinin inkişafına, eləcə də bədii-estetik zövqünün formalaşmasına, ədəbiyyata, teatra marağının artırılmasına xidmət etdiyini bildirib. O, tələbələrin belə bir əsərdə rol almasına məmnunluqla yanaşdıqlarını vurğulayaraq, tədbir iştirakçılarının tamaşadan zövq alacağına əminliyini söyləyib.
Sonra tələbələrin ifasında əsərdən ingilis dilində müxtəlif epizodik səhnələr nümayiş etdirilib. Hər bir səhnə əsərin əsas ideyasını, obrazların daxili aləmini, personajlar arasındakı münasibətləri və dövrün ictimai-mədəni mənzərəsini əks etdirməyə yönəlib.
Tamaşa tədbir iştirakçıları tərəfindən böyük maraqla qarşılanıb və tələbələrin səhnə mədəniyyəti yüksək qiymətləndirilib.
