Günümüzdə həkimlər yalnız müalicə edən insanlar deyil, həm də yaşama ümidini aşılayan qəhrəmanlardır. Onlar yalnız dərmanla deyil, baxışları, səs tonları və qərarları ilə həyatlara toxunurlar. Bu dəfə müsahibimiz – invaziv kardioloq Gülanə Ağayevadır. O, hər gün ürəyi dayanan insanlara ikinci şans verməyə çalışır. Həkimlik onun üçün sadəcə peşə yox, həyat fəlsəfəsidir.
“Məqsədim – dayanmış bir ürəyi döyündürməkdir”
– Həkim, ilk olaraq sizi tanıyaq. Özünüzü necə təqdim edərdiniz?
- Mən invaziv kardioloq kimi çalışıram. Hər gün həyatla ölüm arasında incə cizgidə duran insanlarla təmasda oluram. Məqsədim –ürəkləri qorumaq və sağaltmaqdır. Bu peşə mənim uşaqlıq arzum olub.
“Kardiologiya – həyatın ritminə toxunmaqdır”
– Tibbə marağınız necə yarandı? Niyə məhz kardiologiya?
- Həkimlik mənim üçün sadəcə bir ixtisas deyil – bu, bir missiyadır. Uşaqlıqdan insanlara yardım etməyə can atmışam. Kardiologiyanı isə ona görə seçdim ki, ürək – həyatın mərkəzidir. Dayanmış bir ürəyi yenidən döyündürmək, bir insana nəfəs vermək – bu hissin izahı yoxdur.
“Hər xilasedici müdaxilə – bir həyat dərsidir”
– Heç olubmu ki, bu sahəni seçdiyinizə təəssüflənmisiniz?
- Xeyr, heç vaxt. Əksinə, hər uğurlu müalicədən sonra özümə deyirəm: “Doğru yoldasan.” Bəzən bir ailənin göz yaşlarında, bir uşağın gülüşündə o qədər güc tapıram ki… bu işi sevməmək mümkün deyil.
“Şəfa vermək – yalnız bədəni deyil, ruhu da sağaltmaqdır”
– Başqasına şəfa verməyin sizin üçün mənası nədir?
- Bu, mənim üçün təkcə tibbi prosedur deyil. Bu – ümid vermək, yaşama inamı qaytarmaq, ruhu dirçəltməkdir. Hər xəstə yalnız bir bədən deyil, həm də bir həyatdan, ailədən, hekayədən ibarətdir. Biz sadəcə ürəklərə toxunmuruq – biz yaşama həvəsini geri qaytarırıq.
“Müalicənin özü – zamana qarşı bir yarıştır”
– Daha çox hansı təcili hallar ilə qarşılaşırsınız və nəticələr necə olur?
- Ən çox miokard infarktı, və onun kimi kəskin koronar sindrom halları ilə rastlaşırıq. Bu vəziyyətlərdə təcili angioqrafiya və stent implantasiyası ilə vaxtında müdaxilə çox önəmlidir. Bəzən saniyələr belə həyat qurtarır. Yaxşı nəticə üçün doğru zamanlama və peşəkar komanda əsas şərtdir.
“Səhiyyəyə dəstək artır, amma maarifləndirmə hələ zəifdir”
– Səhiyyəmizə dövlət qayğısını necə dəyərləndirirsiniz?
- Son illərdə səhiyyə sahəsində ciddi irəliləyişlər var. Yeni xəstəxanalar tikilib, texnoloji avadanlıqlar gətirilib, həkimlərə təlim imkanları yaradılıb. Bütün bunlar müsbət addımlardır. Amma paralel olaraq cəmiyyətin tibbi maarifləndirilməsi də vacibdir.
– Niyə insanlar hələ də müalicə üçün şəhərə və ya xaricə üz tutur?
- Bu, çox zaman məlumatsızlıq və bəzi bölgələrdə həkimlərə olan inamla bağlıdır. Halbuki artıq ölkə daxilində də yüksək səviyyəli tibbi xidmətlər mövcuddur. Sadəcə bunu cəmiyyətə çatdırmaq, inam yaratmaq lazımdır.
“Ürək xəstəlikləri cavanlaşır – səbəb həyat tərzidir”
– Son illər ürək xəstəlikləri daha gənc yaşlarda görünür. Bu nə ilə bağlıdır?
- Əsas səbəblər – stress, siqaret, düzgün olmayan qidalanma, hərəkətsizlik və artıq çəki. Texnologiya inkişaf etdikcə insanlar daha az hərəkət edir, daha çox oturaq həyat tərzi keçirir. Bu isə ürək sağlamlığına birbaşa zərbədir.
“Səmimi münasibət – müalicənin açarıdır”
– Həkim-pasiyent münasibətlərini necə qiymətləndirirsiniz?
- Mənim üçün pasiyentlə ünsiyyət – müalicənin ayrılmaz hissəsidir. Hər xəstəni dinləmək, onu başa düşmək, ona inam vermək – bəzən dərmandan da təsirlidir. Anlaşılmazlıqlar bəzən olur, amma peşəkar və səmimi münasibət bu çətinlikləri asanlıqla aradan qaldırır.
“Ürəyinizi qoruyun – o, sizin həyat melodiyanızdır”
– Sonda oxucularımıza nə tövsiyə edərdiniz?
Ürəyinizi qoruyun – o sizin həyat melodiyanızdır. Sağlam qidalanın, hərəkətli olun, siqaretdən uzaq durun. Və ən önəmlisi – illik kardioloji müayinələri unutmayın. Erkən diaqnoz bəzən bir həyat xilas edə bilər. Özünüzü sevin – həyat bir dəfə verilir.
