İyunun 1-də Bakıda Azərbaycanda balıqçılıq sahəsinin inkişafı, balıq təsərrüfatlarının yemlə təmin olunması və beynəlxalq əməkdaşlıq imkanlarına həsr olunmuş seminar keçirilib.
Modern.az xəbər verir ki, tədbirin təşkilatçısı Azərbaycanın bu sahədə fəaliyyət göstərən aparıcı şirkətlərindən biri olan "Sea Diamond" MMC olub. Seminarın əsas tərəfdaşlarından biri isə yüksək keyfiyyətli balıq yemləri istehsal edən, Danimarka və Türkiyənin birgə layihəsi olan BioMar-Sagun şirkətidir.
Seminar iştirakçılarını salamlayan moderator açılış çıxışında Prezident İlham Əliyevin 2023-cü ildə imzaladığı və ölkədə balıqçılıq və akvakulturanın inkişafını hədəfləyən fərmana diqqət çəkib. Qeyd olunub ki, bu sənəd sektora dövlət səviyyəsində verilən ciddi dəstəyin göstəricisidir və seminarın keçirilməsi üçün əsas stimul da məhz həmin fərmandır. Fərman çərçivəsində Kənd Təsərrüfatı Nazirliyinin tabeliyində “Balıqçılıq və Akvakultura Mərkəzi” publik hüquqi şəxsi yaradılıb.
Tədbirin açılışında çıxış edən “Sea Diamond” MMC-nin təsisçisi Amil Hüseynov şirkətin fəaliyyət istiqamətləri və Azərbaycanda bu sahədə əməkdaşlıq imkanları barədə iştirakçılara məlumat verib.
Daha sonra BioMar-Sagun şirkətinin Türkiyə təmsilçiliyinin genel müdiri Yasemin İşsever şirkətin tarixçəsi, məhsul keyfiyyəti və beynəlxalq bazarlardakı uğurlarından bəhs edib. O bildirib ki, Türkiyədə BioMar-Sagun balıqçılıq yemləri sektorunda lider mövqedədir və Azərbaycanla əməkdaşlıq potensialı yüksəkdir.
Seminarda həmçinin şirkətin satış müdiri Sertaç Öcey, Azərbaycandakı təsərrüfatlarla tanışlıqlarına və potensial əməkdaşlıqlara dair ətraflı təqdimatla çıxış edib. O, yerli sahibkarlara öz təklif və tövsiyələrini çatdırıb.
Tədbirdə Kiçik və Orta Biznesin İnkişafı Agentliyinin (KOBİA) Regional layihələrlə iş və monitorinq şöbəsinin aparıcı mütəxəssisi Ramin Babayev də çıxış edərək, ölkədaxili tənzimləmə, dəstək mexanizmləri və balıqçılıq sahəsində yerli sahibkarların rolu barədə danışıb.
Seminar çərçivəsində deputatlar – Milli Məclisin Aqrar siyasət komitəsinin rəhbəri Tahir Rzayev, sədr müavini Razi Nurullayev və komitənin digər üzvləri Aydın Hüseynov və Vüqar İsgəndərov da söz alaraq fikirlərini bildiriblər. Tədbirin fasiləsindən sonra isə çıxış edən BioMar şirkətinin Rusiya üzrə nümayəndəsi Dmitriy Arşavski regionda aparılan işlər və təcrübələr haqqında məlumat verib, iştirakçıların suallarını cavablandırıb.
Seminarın sonunda təşkilatçıları “Sea Diamond” MMC və BioMar şirkətinin nümayəndələri tədbirdə iştirak edən hər kəsə təşəkkürlərini bildiriblər. Rəsmi hissənin ardınca qonaqlar üçün ziyafət təşkil olunub.
Tədbir iştirakçıları seminarın yerli və beynəlxalq əməkdaşlığın genişlənməsinə, akvakultura və balıqçılıq sektorunun inkişafına töhfə verəcəyini bildiriblər. Gələcəkdə bu istiqamətdə yeni müzakirələrin və layihələrin davam etdirilməsi nəzərdə tutulur.
