ABŞ prezidenti Donald Trampın Ukraynadakı münaqişə ilə bağlı səbri tükənib.
Modern.az xəbər verir ki, bunu ABŞ-ın Türkiyədəki səfiri Tom Barak NTV telekanalına müsahibəsində bildirib.
Diplomatdan Ağ Ev rəhbərinin Türkiyə prezidenti Rəcəb Tayyib Ərdoğanın özünün, Rusiya və Ukrayna liderləri Vladimir Putin və Volodimir Zelenskinin, həmçinin Trampın iştirakı ilə dördtərəfli görüş keçirmək təşəbbüsünə münasibəti soruşulub.
Barak qeyd edib ki, o, ABŞ prezidentinin adından danışa bilməz, lakin hesab edir ki, bu, effektiv qərarların veriləcəyi və təhlükəsizliyin təmin ediləcəyi “mənalı görüş” olmalıdır. Diplomatın fikrincə, münaqişənin hər iki tərəfi ilə əlaqə saxlayaraq nizamlanma prosesində əsas rol oynayan Türkiyə bütün maraqlı tərəflər üçün ağlabatan həll yolu nazimə lazım olan məsələlərin dairəsini müəyyənləşdirə bilər.
"Prezident Trampın səbri tükəndi, onu çox səbirli adam adlandırmaq olmaz. İndi Türkiyə müdaxilə edib əməliyyat problemlərini aradan qaldırdığı üçün liderlərin zirvə görüşü baş tuta bilər. Və düşünürəm ki, biz bu məsələni hamı üçün həll edə bilərik", - Barak deyib.
Rusiya və Ukrayna nümayəndə heyətlərinin İstanbulda keçirilən ikinci görüşü və Ərdoğanın təklifindən sonra Ağ Ev bildirib ki, Tramp Rusiya və Ukrayna liderləri ilə görüşə açıqdır. Mayın əvvəlində Dövlət Departamenti nizamlamada vasitəçi kimi çıxış etməkdən imtina etdiyini bəyan edib.
İyunun 2-də İstanbulda Rusiya və Ukrayna tərəfləri arasında birbaşa danışıqların ikinci raundu keçirilib. Moskva və Kiyev arasında sülh yolu ilə nizamlanmaya dair memorandum layihələrinin mübadiləsi aparılıb.
