Ermənistanda hüquqşünas Ara Zöhrabyan Baş nazir Nikol Paşinyanı Erməni Apostol Kilsəsinin nümayəndələri haqqında verdiyi açıqlamalara görə Korrupsiyaya Qarşı Mübarizə Komissiyasına şikayət edib.

Modern.az xəbər verir ki, Zöhrabyanın sosial şəbəkədə bildirib ki, “Dövlət qulluğu haqqında” qanuna əsasən, məmurlar özlərini sivil və hörmətli aparmalı, eyni zamanda obyektiv olmalıdırlar.

Hüquqşünas deyib ki, Paşinyan, ən yüksək post tutan ruhanilər, o cümlədən katolikos II Qaregin və arxiyepiskop Mikael Ajapaxyan haqqında kobud ifadələr işlədib, baxmayaraq ki, “Ermənistan Respublikası ilə Erməni Apostol Kilsəsi arasında münasibətlər haqqında” qanuna əsasən, dövlət öz mənəvi xidməti çərçivəsində Erməni Apostol Kilsəsinin muxtariyyətini tanıyır.

Zöhrabyanın sözlərinə görə, Paşinyanın davranış qaydalarını pozması faktlarının araşdırılmasını tələb edən şikayəti Korrupsiyaya Qarşı Mübarizə Komissiyasına təqdim olunub.

Xatırladaq ki, mayın 29-da hökumətin iclasında Nikol Paşinyan bildirmişdi ki, erməni kilsələri “zibillə dolu şkaflara” bənzəyir. Ertəsi gün o, sosial şəbəkədə sərt bir yazı dərc edərək, Erməni Apostol Kilsəsi iyerarxlarına qarşı kobud sözlər işlədib və arxiyepiskoplardan birini cinsi azğınlıqda ittiham edib. Eyni zamanda, baş nazir subaylıq andını pozan bütün keşişlərin kilsələrdən uzaqlaşdırılmasını tələb edib.

Baş nazirin həyat yoldaşı Anna Akopyan da analoji çıxışlar edib, o, erməni patriarxı “əsas mafioz”, kilsələrin tənqidinə dözməyənləri “ölkənin əsas pedofilləri” adlandırıb. Bu açıqlamalar din adamlarının kəskin reaksiyasına səbəb olub.

Qalmaqalın fonunda baş nazir Erməni Apostol Kilsəsi rəhbərinin seçilməsi prosedurunun dəyişdirilməsini təklif edib.