İsti yay günləri yaxınlaşdıqca istirahət planları da gündəmə gəlir. Dəniz qırağı, xarici ölkələr və ya şəhər həyatından uzaq, təbiətlə baş-başa keçən bir gün, seçim çoxdur. Amma bu dəfə diqqətimizi Azərbaycanın gözəl regionlarına yönəldək. Bəs, bölgələrdə bir günlük istirahət qiymətləri neçiyədir?
Modern.az Trend-ə istinadla xəbər verir ki, rayonlarda bir günlük istirahət qiymətləri seçdiyiniz məkanın növü, mövsüm və yerləşdiyi bölgəyə görə dəyişir.
Əgər istirahəti maksimum komfortla, beşulduzlu otellərdə, SPA mərkəzlərində və zəngin səhər yeməyi ilə təsəvvür edirsinizsə, qiymətlər də uyğun olaraq yüksəlir. Məsələn, "Quba Palace", "Şamaxı Palace", "Qəbələ Chenot Palace" kimi yerlərdə iki nəfər üçün bir gecəlik qalmaq 250–350 AZN arası dəyişir. Bu qiymətə adətən səhər yeməyi və bəzi əlavə xidmətlər daxil olur. "Qəbələ Garden", "Şəki Saray", Lerikdəki kiçik otellər və istirahət mərkəzlərində isə qiymətlər 80–150 AZN arasında dəyişir. Bu tip məkanlarda əsasən ailələr istirahət etməyi üstün tutur. Həm qiymət sərfəlidir, həm də şərait qənaətbəxşdir.
Sərfəli və səmimi istirahət istəyənlər üçün kənd evləri ideal seçimdir. İsmayıllı, Lahıc, Lerik və Qax kimi bölgələrdə kənd sakinlərinin kirayə verdiyi evlərdə qalmaq bir nəfər üçün gündə cəmi 20–30 AZN-ə başa gəlir. Əgər ailə ilə getmək istəyirsinizsə, bir günlük 60-80 AZN ödəməklə 2-3 otaqlı ev tapmaq mümkündür. Bu istirahət növü sizi lüksdən uzaq saxlasa da, yerli mətbəx, təbiət və səmimi qarşılanma ilə yadda qalacaq.
Göründüyü kimi, qış aylarında 160–170 AZN-ə təklif olunan beşulduzlu otel otaqları yayda 250–300 AZN-ə qədər yüksəlir.
