“Ermənistanla Türkiyə arasında münasibətlərin normallaşması zamanın işidir. Bu, bizdən ardıcıl olmağı, fəal işləməyi, fəal dialoq aparmağı, bir-birimizi dinləməyi və öz mövqelərimizi mümkün qədər aydın şəkildə təqdim etməyə çalışmağı tələb edir. Və əməkdaşlığımızın nəticələrinə əsasən, mən əminəm ki, bizim nəticələrimiz olacaq”.
Modern.az xəbər verir ki, bunu Ermənistanın baş naziri Nikol Paşinyan Türkiyənin erməni icması ilə görüşündə deyib.
"Biz təkcə bu məntiqlə deyil, əvvəlki təcrübəmizdən müəyyən nəticələr çıxarmalıyıq. Bu səfərdən gözləntilərimizi də şişirtməməliyik", - deyə Paşinyan Türkiyəyə dünənki səfəri barədə qeyd edib.
O, Türkiyə prezidentinə dəvətə görə təşəkkür edib.
“Mən onu, həmçinin Türkiyənin dəstəyi ilə gələn ilin yazında İrəvanda keçiriləcək Avropa Siyasi Birliyinin sammitində iştirak etmək üçün Ermənistana dəvət edirəm. Ümid edirəm ki, gələn il görüşümüz Ermənistanda baş tutacaq”.
Paşinyan hazırda İstanbuldan İrəvana aviareysin olduğunu xatırladaraq quru sərhədinin də açılacağına əminliyini ifadə edib.
“Biz Türkiyə ilə münasibətlərə mahiyyət etibarı ilə sıfır nöqtədən başlamışıq, mahiyyət etibarı ilə bu, yeni əlaqələr qurmaq üçün bir fürsətdir və bu, ölkələrimizin maraqlarından irəli gəlir”.
Onun sözlərinə görə, indiki proses əslində Türkiyə prezidenti Ərdoğan ilə 2022-ci ildə Praqada keçirilən ilk görüşlə başlayıb, bundan sonra Ermənistan və Türkiyə arasında xüsusi nümayəndələr arasında dialoq start götürüb, daha sonra xarici işlər nazirləri arasında aktiv təmaslar başlayıb.
“Keçən il Nyu-Yorkda Türkiyə prezidenti ilə görüşüm oldu, bu müddət ərzində bir neçə telefon danışığımız baş tutdu və əlbəttə ki, bu, çox mühüm mərhələdir.
Ermənistanla Türkiyə arasında münasibətlərdə nə dəyişdi?
Bu, çox mühüm məsələdir, çünki bir neçə il əvvəl bu və ya digər məsələdə Türkiyənin mövqeyini aydınlaşdırmaq lazım idisə və ya Türkiyə bu və ya digər məsələdə Ermənistanın mövqeyini aydınlaşdırmaq istəyirdisə, hər iki tərəf üçüncü dövlətlər vasitəsilə bunu etməyə cəhd etməli idi.
Hesab edirəm ki, bizim Türkiyə ilə artıq birbaşa təmaslarımızın olması vacibdir və bu, müəyyən gündəmlər formalaşdırmağa, müzakirələr aparmağa çalışmağımız üçün zəruri və vacib şərtdir. Mən təkcə ikitərəfli səviyyədə baş tutan görüşləri nəzərdə tutmuram. Əvvəlki dövrdən fərqli olaraq, indi Türkiyə ilə əlaqələrimiz çox intensivdir.
Bizim müzakirələrimiz gələcək hadisələrin inkişafına müəyyən təsir göstərəcək və Ermənistan-Türkiyə münasibətlərinə yeni təkan verəcək.
Biz bu münasibətləri Ermənistan və Türkiyə arasında dövlətlərarası münasibətlər kimi formalaşdırmağa borcluyuq, baxmayaraq ki, ictimai müstəvidə Ermənistan-Türkiyə münasibətləri haqqında danışmağa davam edirik”, - Paşinyan qeyd edib.
