Dağıstanın dövlət katibi Maqomed-Sultan Maqomedov saxlanılıb.
Modern.az Apa-ya istinadən xəbər verir ki, bu gün onun evində və daha 50-yə yaxın ünvanda axtarışlar aparılıb.
Axtarışların “Dagneftebaza”nın qanunsuz özəlləşdirilməsi faktı ilə bağlı açılan cinayət işi əsasında aparıldığı bildirilib.
Yerli KİV-in yazdığına görə, cinayətin konkret subyekti hələ müəyyən edilməyib, araşdırmanın nəticələri buna aydınlıq gətirəcək.
"Hələlik söhbət “Dağneftəbaza”nın özəlləşdirilməsinin qanunsuzluğundan və 2005-ci ildə özəlləşdirmədən sonra neft bazasının fəaliyyətindən əldə edilən gəlirlərin leqallaşdırılmasından gedir.Hər şey müsadirə olunur. Artıq bununla bağlı iddia qaldırılıb. Dağıstanın dövlət katibi Maqomed-Sultan Maqomedova yaxın şəxslərin yaşayış və iş ünvanlarında aparılan axtarışlar əməliyyat-istintaq tədbirlərinin yalnız birinci mərhələsidir. FSB əməkdaşlarının diqqətini təkcə özəlləşdirilən “Dağneftəbaza”nın indiki sahibləri deyil, həm də təsisçiləri və mülkiyyətçiləri arasında onun özəlləşdirilməsinə kömək edənlər cəlb edib",deyə Dağıstanın yerli KİV-i yazıb.
Qeyd edək ki, Maqomedov 2021-ci ildən Dağıstanın dövlət katibi vəzifəsini tutur.
