Bu gün işğaldan azad edilmiş Kəlbəcər rayonunda xidməti vəzifələrini yerinə yetirərkən minaya düşərək şəhid olmuş jurnalist, Azərbaycan Televiziyasının operatoru Sirac Abışovun doğum günüdür.
2021-ci ilin iyunun 4-ü Kəlbəcər rayonuna ezam olunmuş telekanal və informasiya agentlikləri əməkdaşlarını aparan “KamAZ” markalı sərnişin avtomobili rayonun Susuzluq kəndi ərazisində ermənilərin yerləşdirdiyi tank əleyhinə minaya düşüb. Hadisə nəticəsində Sirac Abışov və Məhərrəm İbrahimov şəhid olub.
Qeyd edək ki, bu gün Sirac Abışovun ad günüdür.
Modern.az şəhid operator Sirac Abışovun qardaşı Şirzad Abışov ilə əlaqə saxlayıb.
O bildirib ki, qardaşının ad gününü 2021-ci ildən bu yana Şəhidlər Xiyabanında, daha sonra isə əvvəlcədən müəyyən etdikləri yerdə ehsan süfrəsində qeyd edirlər:
“Dövlətimiz, cənab Prezidentimiz sağ olsun, Siracın adının yaşması üçün müəyyən işlər görülüb. Biz özümüz rəsmi qaydada onun ad gününü dövlət orqanlarının nümayəndələri, şəhər ictimaiyyəti dövlət televiziyasının əməkdaşları ilə birlikdə Şəhidlər Xiyabanında qeyd edirik”.
Ş.Abışov qeyd edib ki, Siracın yaşadığı evdə xatirə guşəsi yaradılıb: "Siracın medallarını, fəxri fərmanlarını, şəhadətə ucalan zaman üzərindəki əşyaları həmin guşədə saxlayırıq".
Şəhid jurnalistdən geriyə Özgür adlı oğlu yadigar qalıb.
"Bu adı ona atası, azad və sərbəst böyüsün və yaşasın deyə qoyub. Özgür bu il məktəbəqədər təhsilə başlayacaq, gələn il isə 1-ci sinifə gedəcək", - Şirzad Abışov qeyd edib.
