Bu gün Bakı-Ağdam sərnişin qatarı işə salınıb.
32 ildən sonra Bakıdan Ağdama yola düşən ilk sərnişinlər arasında Birinci Qarabağ müharibəsinin veteranı Hacı Əkbər Rüstəmov da var.
“Qalx ayağa, Vətən oğlu”, “Qapını vətən döydü”, “Vətən” və “Qayıt gəl” kitablarının müəllifi olan müharibə veteranı Hacı Əkbər Rüstəmov Modern.az-la təəssüratlarını bölüşən zaman bu günü həyatının ən qürurlu anı kimi dəyərləndirib.
O, uzun illər həsrətlə gözlədiyi yurduna dönüş sevincini belə ifadə edib:
“İndi qayıdırıq evimizə – Ağdama… Bu gün sevinirəm ki, tarixi anlar yaşanır, Ağdama qatar yola düşür. Hər il nəvələrimi götürüb səngərdən Ağdama baxmışam. İndi onlar universiteti bitirib, ailə həyatı qurublar. Bu gün isə mən özüm doğma torpağıma gedirəm. Bundan böyük fəxr varmı?”
Veteran həmçinin 1992-ci illərdə çəkilmiş səngər fotosunu da bizimlə bölüşüb.
