Milli Məclisin deputatı, COP29 Təşkilat Komitəsinin üzvü Pərvanə Vəliyeva BMT tərəfindən Parlament üzvləri üçün BMT Akademiyasının rəsmi üzvü kimi tanınıb.
Modern.az xəbər verir ki, o, 24-29 avqust tarixlərində 30 müxtəlif ölkədən seçilmiş parlamentarilərlə birgə BMT-in Parlament üzvləri üçün Qlobal Dəyişim Liderləri Akademiyasında (Global Changemakers Academy for Parliamentarians- GCAP) müzakirələrdə iştirak edib.
Almaniyanın Bonn şəhərində yerləşən, BMT ofisində keçirilən proqram G20-in Qlobal Torpaq Təşəbbüsü tərəfindən, BMT-nin Səhralaşma ilə Mübarizə üzrə Konvensiyası (UNCCD) və BMT Sisteminin Heyət Kolleci (United Nations System Staff College) ilə əməkdaşlıq çərçivəsində təşkil olunub.
Tədbir zamanı P.Vəliyeva Azərbaycanın COP29-a uğurlu sədrliyindən, əldə edilən nailiyyətlərdən və ölkəmizin ətraf mühitin qorunması və iqlim üzrə qlobal fəaliyyətinə dair təqdimatlar edib. O, Azərbaycanın “Təmiz Şəhər” konsepti, tullantıların təkrar emalı, torpaqların təmizlənməsi, eko-parkların salınması, eləcə də humanitar minatəmizləmə kimi uğurlu layihələri parlamentarilərlə bölüşüb.
Tədbir müddətində Bonn və Eşvailar şəhərlərinin merləri ilə ayrı-ayrılıqda görüşlər keçirilib, onların dayanıqlı və sağlam şəhərsalma təcrübələri öyrənilib, Almaniyada yerləşən Avropanın enerji təchizatında mühüm oyunçu olan enerji şirkətinə və ən böyük kömür mədəninə sahə səfəri edilib.
P. Vəliyeva Azərbaycanın neft və təbii qazla zəngin ölkə olsa da, qlobal karbon emissiyasındakı payının 0.1% az olduğunu və bu xüsusda hələ də Avropada ekoloji cəhətdən ən çirkli yanacaq - kömürdən istifadənin təəssüf doğurduğunu bildirib.
Tədbir ərzində P.Vəliyeva BMT Sisteminin Heyət Kolleci dəvəti ilə BMT TV-də müsahibə verib.
O, müsahibədə iqlim dəyişmələrinin Yer kürəsində göllərə təsirindən, səhralaşmadan və Xəzər dənizinin qlobal istiləşmə, həmçinin antropogen təsirlərlə bağlı üzləşdiyi ekoloji problemlərdən bəhs edib. Proqram çərçivəsində müxtəlif ölkələrdən olan deputatlarla fikir mübadiləsi aparılıb.
Sonda isə BMT tərəfindən millət vəkilinə “Parlament üzvləri üçün Qlobal Dəyişim Liderləri Akademiyasının” rəsmi üzvü kimi tanınmasını təsdiq edən sertifikat təqdim olunub.
Qeyd edək ki, Akademiyada iştirak üçün 40-dan çox ölkədən, 145 müraciət daxil olsa da, sonda müsabiqə əsasında, 30 parlamentari seçilmişdi.
