Azərbaycan Prezidenti İlham Əliyev avqustun 31-də Çinin Tiencin şəhərində bir sıra nüfuzlu şirkət rəhbərləri ilə görüşlər keçirib.
Modern.az xəbər verir ki, dövlət başçısı “China Energy Engineering Corporation Limited” (“Energy China”) şirkətinin prezidenti və sədri vəzifəsini icra edən Ni Cen ilə görüşündə Azərbaycanla, o cümlədən SOCAR ilə həyata keçirilən alternativ və bərpaolunan enerji layihələrindən məmnunluq ifadə olunub. Söhbət zamanı yaşıl enerji sahəsində əməkdaşlıq, günəş və dəniz külək elektrik stansiyalarının tikintisi, tullantı sularının təmizlənməsi və təkrar istifadəsi, su ehtiyatlarının idarə edilməsi, həmçinin su hövzələrində fotovoltaik panellərin quraşdırılması kimi layihələr müzakirə edilib.
Prezident İlham Əliyev həmçinin “Sichian Sunsync Photovoltaic Technology Co” şirkətinin təsisçisi və sədri Sie İ ilə də görüşüb. Ələt Azad İqtisadi Zonasında günəş panelləri istehsalı üzrə müasir texnologiyalara əsaslanan müəssisənin yaradılması və istehsal olunacaq məhsulların dünya bazarlarına ixracı məsələləri diqqət mərkəzində olub. Sie İ Azərbaycanda əlverişli investisiya mühitini və Çinlə strateji əlaqələri nəzərə alaraq ölkəmizə sərmayə yatırmaq qərarına gəldiklərini bildirib.
Bundan əlavə, Prezident İlham Əliyevin “CETC” (China Electronics Technology Group Corporation) korporasiyasının baş direktoru Cu Pen ilə görüşündə rəqəmsal texnologiyalar vasitəsilə milli idarəetmənin müasirləşdirilməsi, rəqəmsal iqtisadiyyatın inkişafı, kibertəhlükəsizlik və milli şəbəkə təhlükəsizliyinin təmin olunması sahələrində əməkdaşlıq imkanları müzakirə edilib.
