Qərb ölkələrinin Ukraynaya Rusiyanı ağır raketlərlə vurmağa icazə verməsi, Rusiyanın isə buna cavab olaraq orta mənzilli raketlərlə Ukrayna şəhərlərini hədəfə alması iki ölkə müharibənin miqyasını daha da genişləndirib. Bu addımlar,yalnız Rusiya və Ukrayna arasında deyil, həm də Qərb və Rusiya arasında gərginliyin pik həddə çatdığını göstərir.
Artıq hər iki tərəf bu qarşıdurmanın nəzarətdən çıxa biləcəyini anlayır və beyin mərkəzləri Üçüncü Dünya müharibəsinin qaçılmaz olacağı barədə xəbərdarlıq edir. Hazırda beynəlxalq analitiklər Üçüncü Dünya müharibəsi ssenarilərini ciddi şəkildə müzakirə edir. Bunun əsas səbəbi isə müasir texnologiyalar və nüvə silahlarının müharibəyə daxil olma ehtimalıdır.
Nüvə silahlarının istifadəsi ilə bağlı “qırmızı xətlərin” pozulması dünya üçün faciəvi nəticələrə səbəb ola bilər. Qərbin və Rusiyanın müharibəni diplomatik yolla həll etməkdən uzaqlaşması bu təhlükəni daha da gücləndirir.
Ukrayna müharibəsi artıq yalnız bir regional münaqişə deyil, qlobal təhlükəsizlik üçün ciddi bir sınağa çevrilib. Qərb və Rusiya arasında böhranın nəzarətdən çıxması dünyanı fəlakətə sürükləyə bilər.
Modern.az-a danışan türk general Yücel Karauz Üçüncü Dünya müharibəsinin çoxdan başladığını bildirib.
"Dünya onsuz da Üçüncü Dünya Müharibəsinə daxil olub. Bunun üçün Birinci və İkinci Dünya müharibələrində olduğu kimi bir başlanğıc gözləmək lazım deyil. Rusiya-Ukrayna müharibəsi, Fələstin-İsrail münaqişələri timsalında birdən çox cəbhələrdə Üçüncü Dünya Müharibəsi gedir. Üçüncü Dünya müharibəsi NATO-nun Rusiya və Çini düşmən elan etməsindən sonra başladı. Rusiya-Ukrayna müharibəsinin 3-cü ilinə yaxınlaşır. Təəssüf ki, hər iki tərəf bir-birinə qarşı tam üstünlük təmin edə bilmədi. Rusiya da, Ukrayna da başlanğıcda qarşısına qoyduğu hədəflərə çata bilmədi. Nəticədə, 8 milyon insan qaçqın vəziyyətinə düşdü. Rusiyanın hərbi müdafiə sənayesi zəiflədi. Qərbin, ABŞ-nin təqribən 5 milyard dollarlıq yardımı ilə Ukrayna ayaqda durmağa çalışır. Qərb uzaqmənzilli raketlərinin istifadəsinə bu günə qədər icazə verməmişdi. Rusiya rəsmiləri bunun Rusiyanın qırmızı xəttini tapdalayacağını və Rusiyanın nüvə silahlarından istifadə edəcəyini bildirdi. Rusiyanın nüvə doktrinası bu yaxınlarda dəyişdirildi. Hazırkı mərhələdə iki tərəfdə bir-birinə qarşı uzunmənzilli ballistik raketlərlə strateji hədəflərini vururlar".
Hərbi ekspert hadisələrin belə davam etməsi halında baş verəcəklər barədə danışıb:
"Vəziyyət ağrılı xarakter alsa, Rusiya Ukraynadakı nüvə stansiyalarını və Kiyevi vura bilər. Ukrayna bu silah sistemlərindən istifadəyə davam etsə, Rusiya qısa və orta mənzilli nüvə raketlərindən istifədə edə bilər. Böyük Britaniyanın, Fransanın verdiyi silah sistemləri Rusiyanın dərinliklərini vursa, o ölkələrdə terror hücumları, kiber hücumlar həyata keçirilə bilər. Hətta Rusiya o ölkələrdə enerji asılılığından qaynaqlanan iqtisadi gücündən istifadə etmək istəyə bilər. Məncə, bütün bu hadisələr Tramp hakimiyyətə gəlmədən masanın qurulması üçün atəşkəs şərtlərini yetkinləşdirmək üçün həyata keçirilən manevrlərdir. Tramp dövründə danışıqlar masası qurulsa,bu, Rusiyanın indiyə qədər əldə etdiyi ərazilərin bir qismini alması ilə nəticələnə bilər. Bundan əvvəl Rusiyanın əldə etdiyi Donbass və Krımın daha muxtar ərazi kimi Rusiyanın tərkibinə keçməsi də mümkündür. Belə olan halda müharibənin hərbi baxımdan qalibi olmaz. Amma siyasi baxımdan Rusiya fayda əldə edə bilər. NATO-ya üzv olan baltikyanı ölkələr və Avropa rahat nəfəs almış olar. Ara yerdə Ukrayna ziyan çəkmiş ola bilər".
Hərbi ekspert Elxan Şıxaliyev isə qeyd edib ki, Avropanın 30-dan çox ölkəsinə qarşı Rusiya nüvə silahından istifadə edə bilər:
"ABŞ-nin yeni seçilmiş Prezidenti Donald Trampın hakimiyyətə gəlməsinə 2 ay qalmış bir vaxtda Rusiya-Ukrayna müharibəsi yeni mərhələyə keçdi. Bayden hökuməti Ukranaya uzaqmənzilli silahlardan istifadəyə icazə verdi. İndiki təmas xəttindən 306 kilometr bir məsafəyə zərbə endirilə bilər. Rusiyanın kifayət qədər strateji obyektləri hədəf alına biləcək. Hərbi aerodromların və infrastrukturun, yəni arsenalın qorunub saxlandığı anbarın, qərargahların sıradan çıxarılması, neft və qaz istehsalı sahələrini sıradan çıxarılmasına Ukrayna zərbələr endirə bilər. Buna cavab olaraq, Rusiya müharibənin gedişində qarşı qoya biləcək addımlar atması ehtimal olunur. Rusiya Prezidenti nüvə doktrinasınının yenilənmiş versiyasını imzaladı. İndiki variantda nüvə ölkələri bir-birinə qarşı təhdid yaratdıqda nüvə silahından istifadə edə bilir. Yeni doktinə əsasən, yalnız nüvə silahı ilə deyil, konvensianal silahla da Rusiyaya qarşı müharibə təəhlükəsi yaradacaqsa, Rusiya nüvə silahından istifadə legitimliyindən istifadə edəcək. Avropanın 30-dan çox ölkəsinə qarşı Rusiyanın nüvə silahından istifadə etmək ehtimalı artır".
Ekspert tərəflərin Trampın inaqurasiyasına qədər tələsəcəklərini deyib:
"Avropa İttifaqı ölkələrinin Baydenin qərarını indiki mərhələdə dəstəklədiyi görünür. Xüsusən Britaniya və Fransa da müxtəlif silahlarının istifadəsinə imkan verməyi müzakirə edir. Bu müharibədə vəziyyəti dəyişəcək. Rusiyanın müharibəyə yanaşması dəyişəcək. Ukrayna da, Rusiya da Trampın inaqurasiyasına qədər tələsəcəklər. Çünki Tramp müharibəni dayandıracağını demişdi. Tərəflər daha çox müharibə arealında və masada əli güclü olmaq üçün daha çox tələsəcəklər".
