Gürcüstan tarixində növbəti dəfə ağır dönəmdən keçir. Hakimiyyətin Avropa İttifaqı ilə danışıqları təxirə salması barədə sensasion qərarı müxalifətin sərt reaksiyasına səbəb olub. Tbilisi küçələrində nümayişçilər və təhlükəsizlik qüvvələri arasında şiddətli toqquşmalara çevrilən etirazlar səngimir.
Etirazlar ölkənin dörd bir tərəfini əhatə edib. Böyük Batumi və Kutaisi şəhərlərindən tutmuş kiçik Axalsıx və Xaşuriyə qədər aksiyalar keçirilir.
Buna baxmayaraq, hakimiyyət nümayəndələri heç bir güzəştə getmək niyyətində olmadıqlarını açıq şəkildə bildirir. Hakim “Gürcü Arzusu” partiyasının rəhbərliyi qeyd edir ki, “xüsusi təlim keçmiş qruplar” ölkədə “rəngli inqilab”a cəhd edir, ancaq buna imkan verməyəcəklər.
Modern.az ölkədəki vəziyyəti öyrənmək üçün Gürcüstanın Beynəlxalq Münaqişə və Danışıqlar Mərkəzinin eksperti Zaal Anjaparidze ilə həmsöhbət olub.
O, ölkəsində baş verən hadisələri "Gürcüstan tarixində misli görünməmiş" hadisə adlandırıb. “Ölkə prezidenti hökümətə qarşı hərəkətlərdə birbaşa iştirak edir. Bu o deməkdir ki, birbaşa qanunsuzluğu və zorakılığı təbliğ edir. Son günlər Tbilisinin mərkəzində baş verən bütün zorakı hərəkətlər başdan sona kimi dörd radikal müxalifət partiyası, onların liderləri və sponsorları tərəfindən idarə olunur və maliyyələşdirilir. Buna görə də bu partiyaların rəhbərləri xəsarət alan polislərə və ya etirazçılara görə məsuliyyət daşıyır", - ekspert bildirib.
Qeyd edək ki, oktyabrın 26-da keçirilən parlament seçkilərindən bir ay sonra Tbilisidə etiraz fəallığı səngiyib. Ancaq hökumətin ötən cümə axşamı elan etdiyi Aİ-yə üzvlük danışıqlarının başlanmasını 2028-ci ilə qədər təxirə salmaq qərarı güclü etiraz dalğasına səbəb olub. Etirazlara yalnız müxalifət partiyaları deyil hakimiyyətdə təmsil olunan bir çox şəxs, mədəniyyət xadimləri, QHT-lər də dəstək verib.
Etirazçılarla toqquşmada onlarla polis yaralanıb. "Diqqət edin ki, etirazçılar polisə müqavimət göstərsə də, polis tərəfindən heç bir qisas təcavüzü olmayıb", - ekspert qeyd edib.
Qərbdən də Gürcüstan hakimiyyətinə təzyiqlər artıb. Xüsusilə, ABŞ Gürcüstanla strateji tərəfdaşlığı dayandırdığını bəyan edib. Hadisələrin ilk günündə Aİ-nin xarici işlər və təhlükəsizlik siyasəti üzrə yeni ali nümayəndəsi Kaya Kallas Gürcüstan hakimiyyətinə Avropa İttifaqının “birbaşa nəticələri”nin olacağını bildirib.
Anjaparidze deyir ki, bəyanatlarında hüquq-mühafizəçilərini "İvanişvilinin qüvvələri", xalqın seçdiyi hakimiyyəti "repressiv Rusiya rejimi" adlandırırlar, sonra da yeni seçkilərə hazırlıqdan "razılıq"dan danışırlar:
"Bütün bunlardan sonra inanmıram ki, iqtidar onlara və müxalifətə danışıqlar aparmağa vaxt sərf edəcək.
Ona görə də yaxın zamanda bu olanların dayanacağına ümid edirik”.
Qeyd edək ki, bir çox ekspertlər baş verən hadisələri Gürcüstan üçün yeni dövrün başlanğıcı adlandırıb. Vəziyyətin necə inkişaf edəcəyi hələlik məlum deyil, ancaq Gürcüstanda vəziyyətin bundan sonra eyni olmayacağı hər kəs üçün aydın məsələdir...
