Bir müddət əvvəl Mixail Kavelaşvili Gürcüstanın yeni prezidenti seçilib. Hakim “Gürcü Arzusu” partiyasının namizədi olan Kavelaşvili 300 seçicidən 224 səs toplayıb. Ümumilikdə səsvermədə 225 Kollegiya üzvü iştirak edib, 1 bülleten etibarsız sayılıb.

 

Kavelaşvilinin andiçmə mərasimi dekabrın 29-da keçiriləcək. Hakimiyyət nümayəndələri müxalifətin həmin gün təxribatlar törədəcəyindən ehtiyat edir.

 

Gürcüstanın hazırkı prezidenti Solome Zurabişvili isə vəzifədən getmək niyyətində olmadığını bildirib.

 

Məsələ ilə bağlı Modern.az-a danışan politoloq Elxan Şahinoğlu bildirib ki, Salome Zurabşvili artıq heç nə edə bilməz:

 

"Prezident artıq seçildi və fəaliyyətə də başlayır. Daha  Zurabşvili dövrü də bitdi. O, yeni prezidenti və parlamenti tanımadığını desə də, faktiki yerini boşaltmalı olacaq. Salome Zurabşvilinin indiki hakimiyyətlə başa-baş gəlib mübarizə apara biləcək xarizması da yoxdur.  Bu baxımdan "Gürcü Arzusu" Partiyası və yeni prezident etirazların getdikcə səngiməsinə çalışacaq.Onsuz da artıq etirazçılar arasında yorğunluq özünü göstərir. Əvvəlki günlərdəki kimi etiraz dalğası yoxdur".

E.Şahinoğlu Gürcüstanda xaosun səngiyəcəyini deyib:

 

"Prezident qarşısında ciddi problemlərin olacağını gözləmirəm. Konstitusiyaya görə də prezidentin elə böyük səlahiyyəti yoxdur. Əsas İrakli Kobaxidzedir. Ona görə hesab edirəm ki, prezident hakim partiya ilə ittifaq içərisindədir. Zurabşivili ilə iqtidar arasında dərin ixtilaf  vardı. Bu da əlavə xaos yaradırdı. Bu xaos da ortadan qaldırılıb. Prezident də artıq hakimiyyətin nümayəndəsidir. Prezident institutu ilə hökumət arasında ixtilaf olmayacaq. Bu da hökumətə imkan verəcək ki, heç olmasa bir qarşıdurmadan yayına bilsin".