Gürcüstanda ötən gün mitinqlər davam edib. Tbilisidə keçirilən mitinq zamanı Gürcüstan prezidenti Salome Zurabişviliyə geniş çıxış etməyə imkan verilməyib. O, qısa açıqlamasında hakimiyyətdən 1 həftə ərzində yeni seçkilər təyin etməyi tələb edib.
Qeyd edək ki, bu həftə Gürcüstanın yeni seçilmiş prezidenti and içəcək. 53 yaşlı Mixail Kavelaşvili ötən həftə ölkənin yeni prezidenti seçilib. Ancaq Zurabişvili hakimiyyətdən getməyi planlaşdırmadığını bəyan edib.
Bəs hadisələrin axarı necə olacaq?
Məsələ ilə bağlı Modern.az-a danışan Milli Məclisin Beynəlxalq münasibətlər və parlamentlərarası əlaqələr komitəsinin üzvü Elçin Mirzəbəyli bildirib ki, Salome Zurabişivilinin davranışları ölkə prezidentinin davranışlarına uyğun deyil:
"Gürcüstanda keçirilən parlament seçkilərində və ondan əvvəlki proseslərdə bu aydın şəkildə özünü göstərdi. Təbii ki, o, özünü daha çox başqa ölkənin vassalı kimi hər halda vaxtilə Fransanın təsir agenti kimi aparırdı. Onun bugünkü davranışları isə nə Gürcüstan konstitusiyasına, nə də ümumilikdə dünyada qəbul olunmuş normalara uyğundur. Artıq yeni Prezident seçilib. O, dekabrın 29-dan etibarən fəaliyyətə başlamalıdır. Amma bəlli olduğu kimi, Zurabişivili öz postunu tərk etməyəcəyini bildirib. Prinsip etibarilə bu, artıq Gürcüstanda səngiməkdə olan etirazların yenidən dalğalanmasına cəhddir. Lakin bu, konstitusiyaya zidd davranışdır. Gürcüstan hökuməti də bunu artıq açıq şəkildə büruzə verib, bu barədə öz mövqeyini bildirib. Çünki Zurabişivilinin öz postunu tərk etməməsi hakimiyyəti qəsb etmək kimi qəbul edilə bilər. Bunun üçün də Gürcüstan konstitusiyasında sərt cəza mexanizmi nəzərdə tutulub. Təbii ki, müəyyən xüsusiyyətləri nəzərə alaraq, Gürcstan hakimiyyəti belə bir addım atmaq niyyətində olmadığını deyib. Lakin çıxılmaz vəziyyət yaranarsa, konstitusyon normaların tətbiqi istiqamətində ciddi addımlar atılacaq".
Deputat vurğulayıb ki, Salome Zurabişivili proseslərdə etirazçı qüvvələrin keşiyində dayanmasaydı, onun varlığından-yoxluğundan heç kim xəbərdar olmayacaqdı:
"Daha doğrusu, Qərbdən idarə olunan radikal qrupların keşiyində dayanmasaydı, Zurabişivilinin varlığından-yoxluğundan kimsə xəbərdar olmayacaqdı. Gürcüstanda prezidentin səlahiyyətlərinin kifayət qədər aşağı olması, ümumiyyətlə Zurabşivilinin siyasətçi kimi reytinqinin aşağı olması onun Gürcüstanda əhəmiyyətli fiqur kimi qəbul olunmamasına zəmin yaradıb. Zurabişivili daha çox öz ölkəsinin milli maraqlarına zidd gedən adam kimi yadda qaldı. Hətta Zurabişiviliyə qarşı qanunvericilik səviyyəsində hər hansı addımlar atılacaqsa belə, bu, Gürcüstandakı proseslərin daha aktiv məcraya qədəm qoymasına xidmət etməyəcək. Zurabişivili nə birləşdirici fiqur, nə liderlik keyfiyyətləri olan şəxsdir. Ümumiyyətlə, imici də müsbət deyil. Bu aspektdən onun aqressiv davranışları bu adamın,ümumiyyətlə, Gürcüstan dövlətçiliyinə məxsus olmadığını sübuta yetirir".
