Rusiya Prezidenti Vladimir Putin dekabrın 28-də Azərbaycan Prezidenti İlham Əliyevə zəng edib. Putin dekabrın 25-də Bakı-Qroznı marşrutu üzrə uçuş yerinə yetirən “Azərbaycan Hava Yolları”na məxsus sərnişin təyyarəsinin Rusiyanın hava məkanında fiziki-texniki xarakterli kənar müdaxiləyə məruz qalması və nəticədə baş vermiş faciəvi hadisə ilə bağlı üzrxahlığını ifadə edib, bu qəzada həlak olanların ailələrinə və yaxınlarına dərin və ən səmimi başsağlığını çatdırıb.
Prezident İlham Əliyev “Azərbaycan Hava Yolları”na məxsus sərnişin təyyarəsinin Rusiyasının hava məkanında olan zaman kənar fiziki-texniki müdaxiləyə məruz qaldığını və idarəetməsini tam itirdiyini, Qazaxıstanın Aktau şəhərinə doğru yönləndirildiyini, yalnız pilotların şücaəti və peşəkarlığı sayəsində qəza enişi edə bildiyini qeyd edib. Dövlətimizin başçısı təyyarənin gövdəsində çoxsaylı dəliklərin olmasının, hələ havada olarkən sərnişinlərin və heyət üzvlərinin təyyarənin göyərtəsini dəlib içəri daxil olan yad hissəciklərlə yaralanmalarının, bu xüsusda, sağ qalan təyyarə bələdçilərinin və sərnişinlərin ifadələrinin kənar fiziki-texniki müdaxilə faktını təsbit etdiyini vurğulayıb.
Türkiyəli general Yücel Karauz Vladimir Putinin üzrxahlığını şərh edib.
O, Modern.az-a bildirib ki, Vladimir Putinin üzr istəməsi Rusiyaya və özünə yaraşan addımdır:
"Rusiya lideri Putinin Azərbaycan Prezidenti İlham Əliyevə zəng edərək üzr istəməsi Rusiyaya və şəxsən Putinin özünə yaraşan mövqedir. Kaş ki bu addımı daha qısa müddətdə atsaydılar... Onda işlər heç bu nöqtəyə də gəlib çatmazdı. Nəticə etibarilə gec də olsa, Putinin belə bir münasibət göstərməsi Azərbaycan xalqının, dövlətinin iradəsini, təmkinli davranmasını nümunə kimi ortaya qoydu. Bu, əslində, Azərbaycan dövlətçiliyinin uğurudur. Azərbaycan və Rusiya qonşu və strateji müttəfiqdir, iki ölkə arasında əlaqələrin davam edəcəyi təbii haldır. Hər hadisəni öz içərisində dəyərləndirmək lazımdır. Putinin ölənlərə rəhmət və yaralılara şəfa diləməsi önəmli hadisədir".
Türkiyəli general bundan sonra səhvə yol verənlərin cəzalandırılamasının da vacib olduğunu vurğulayıb:
"Bundan sonra atılmalı addım müştərək beynəlxalq araşdırma komisssiyası ilə hadisənin araşdırılmasıdır. Azərbaycan Hava Yollarının və hadisədən zərərçəkənlərin ailələrinə təzminat ödənilməsi, araşdırmalar nəticəsində istər texniki, istərsə də qəsdən səhvə, diqqətsizliyə yol verənlərin cəzalandırılması növbəti addım olmalıdır. Çünki bu, bəsit səhv deyil. Mən Putinin üzr istəməsindən sonra bu məsələlərə də əl atacağını düşünürəm. Rusiyanın işbirliyi içərisində olacağına, müttəfiqi Azərbaycanı itirməmək üçün lazımi addımları atacağına inanıram".
