Rusiya Federasiyasının Xarici İşlər Nazirliyinin rəsmi nümayəndəsi bir neçə gün bundan əvvəl açıqlamasında bildirib ki, Rusiya Federasiyasının qanunvericiliyinə edilən dəyişikliklərlə, 1 yanvar 2025-ci ildən etibarən əcnəbilərin Rusiya ərazisində müvəqqəti olma müddəti il ərzində cəmi 90 gün olacaq.

 

Nümayəndə qeyd edib ki, əcnəbilər Rusiya torpaqlarına daxil olduqları tarixdən sonra 7 iş günü ərzində olduğu yer üzrə qeydiyyata düşməlidir. Qeyd edək ki, mövcud qaydalara görə bu müddət 180 gün ərzində 90 gün, 1 il ərzində isə 180 gündür. 

 

Xarici İşlər Nazirliyinin mətbuat katibi Ayxan Hacızadə isə bildirib ki, Rusiya tərəfinin tətbiq etdiyi yeni qaydalar və ölkədə qalma müddəti ilə bağlı tələblərin sərtləşdirilməsi ilk növbədə Azərbaycan vətəndaşlarının hüquqları kontekstində nəzərdən keçirilir:

 

"Azərbaycan tərəfi hər bir xarici siyasət məsələlərində olduğu kimi, müvəqqəti olma və miqrasiya məsələlərində də paritet və qarşılılıq prinsiplərindən çıxış edəcək".

 

Mövzu ilə bağlı Modern.az-a danışan İctimai birliklər və dini qurumlar komitəsinin sədri Fazil Mustafa bildirib ki, müvəqqəti qalma müddətinin 90 günə endirilməsi azərbaycanlılara təsir edəcək:

 

"Rusiyada miqrasiya ilə bağlı qanunlar xeyli sərtləşdirildi. Əvvəllər xarici vətəndaşların orada 1 il ərzində 180 gün müvəqqəti  qalmasına icazə verilirdisə, indi  bu müddət 90 günə endirilib. Bu da kifayət qədər az müddətdir. Qərarın təsiri ən çox azərbaycanlılara olacaq. Amma bu məsələlər,adətən, beynəlxalq hüquqda qarşılıqlı uyğunlaşdırma prinsipi ilə həyata keçirilir. Azərbaycan tərəfi də bu istiqamətdə müvafiq addımlar atmalıdır. Yəqin ki, yaxın günlərdə belə addımların şahidi olacağıq. Bu qaydalar azərbaycanlıların Rusiyada müəyyən iş və digər fəaliyyətlərinə ciddi təsir göstərəcək. Bütün hallarda yanvardan başlayan proses vətəndaşlarımızın bir qisminin maraqlarına da toxunacaq".

Komitə sədri söyləyib ki, hazırda hansısa ölkənin qəbul etdiyi qərarları təftiş etməkdən uzağıq:

 

"Hər-halda bu qərarlara uyğun olaraq Azərbaycan öz müvafiq addımlarını atacaq. Hesab edirəm ki, gələcəkdə bu istiqamətdə müəyyən razılaşma olarsa, qaydaların dəyişməsinə görə də təşəbbüslərimiz ola bilər. Amma indiki vəziyyətdə belə bir qərar çox sayda insanın çətinliyə düçar  ola biləcəyini proqnozlaşdırmağa imkan verir. Biz hər-halda Azərbaycan ərazisində qalma müddətini Rusiyanın etdiyinə adekvat olaraq tənzimləməliyik".