Prezident İlham Əliyev 31 Dekabr - Dünya Azərbaycanlılarının Həmrəyliyi Günü və Yeni il münasibətilə xalqa müraciət edib. Ölkə başçısı xalqa müraciəti zamanı Azərbaycana qarşı qarayaxma kampaniyasından da danışıb.

Dövlətimizin başçısı bildirib ki, COP29-u Azərbaycana qarşı istifadə etmək istəyən bəzi Qərb ölkələrinin, onların nəzarətində olan dırnaqarası qeyri-hökumət təşkilatlarının və saxta media orqanlarının bütün səyləri əbəs oldu.

Azərbaycana qarşı şər, böhtan, yalan, iftira, uydurma kampaniyasının aparıldığını və bunun COP-dan sonra da artıq iki aya yaxındır davam etdiyini vurğulayan dövlətimizin başçısı deyib:

“Ümid edirəm ki, gələn il yanvarın sonlarından başlayaraq artıq Azərbaycana qarşı bu diskriminasiya və ayrı-seçkilik, şər, böhtan siyasətinə son qoyulacaq. Hər halda, ümidlər böyükdür”.

Məsələ ilə bağlı Modern.az-a danışan politoloq Elxan Şahinoğlu Prezidentin bu çıxışını belə şərh edib:

"Azərbaycan Prezidenti yanvarın 20-də ABŞ-nin yeni Prezidenti Donald Trampın andiçmə mərasimini nəzərdə tutur. Andiçmədən sonra Donald Tramp Ağ evdə rəsmi olaraq, dövlət başçısı vəzifəsini yerinə yetirəcək. Ümid var ki, Tramp ABŞ-nin xarici siyasətində korrektələr edəcək. Çünki Donald Tramp birinci prezidentliyi dövründə (2016-2020-red) Azərbaycanla əməkdaşlığa və strateji tərəfdaşlığı gücləndirməyə önəm verirdi. Müəyyən ümidlər var ki, Tramp Cənubi Qafqazda Azərbaycanla əməkdaşlığa yenidən önəm verəcək. Çünki ən azı təhlükəsiz enerji sahəsində dialoq hər zaman olub. Bu dialoqun davam etməsinə hər zaman ehtiyac var. Doğrudur, bu o demək deyil ki, ABŞ-da bütün dövlət strukturları Tramp kimi Azərbaycanla əməkdaşlığa əhəmiyyət verəcəklər. Prezidentlər dəyişsə də, ABŞ konqresi hər zaman anti-Azərbaycan mövqeyindən çıxış edir. Erməni lobbisi orada həmişə güclü olub. Önəmli olan isə Ağ Evin fərqli siyasət yürütməsidir. Azərbaycan Prezidentinin və ictimai-siyasi dairələrinin ümidi onadır ki, Tramp administrasiyası Azərbaycana qarşı müsbət, yəni fərqli siyasət yürüdəcək".