Ötən gün Prezident İlham Əliyev yerli media nümayəndələrinin suallarını cavablandırıb. Bu zaman dövlət başçısı Zəngəzur dəhlizi ilə bağlı da danışıb.

İlham Əliyev qeyd edib ki, Zəngəzur dəhlizi açılmalıdır və açılacaqdır:

"Onlar bunu nə qədər tez başa düşsələr, o qədər də yaxşıdır. Biz belə vəziyyətdə qala bilmərik. Biz Azərbaycanın ayrılmaz hissəsi olan Naxçıvana niyə müxtəlif, başqa yollarla getməliyik? Bizim birbaşa əlaqəmiz olmalıdır və bu əlaqə Ermənistanın suverenliyini şübhə altına qoymur. Sadəcə olaraq, onlar 10 noyabr Bəyanatının müddəalarını yerinə yetirməlidirlər. Orada hər şey açıq-aydın göstərilib. Biz dörd ildən çoxdur ki, səbir göstəririk. Dörd ildən çoxdur istəyirik ki, bu, danışıqlar yolu ilə həll olunsun.

Biz nə qədər gözləməli olacağıq və nə üçün gözləməliyik? Yəni, onlar bütün bunları nəzərə almalıdırlar. Mən bir dəfə demişəm, onlar gərək bizi əsəbləşdirməsinlər və başa düşsünlər ki, burada söz sahibi bizik və Cənubi Qafqazda Azərbaycan aparıcı iqtisadiyyatdır, aparıcı hərbi gücdür və aparıcı dövlətdir. Bugünkü dünyada güc amili ön plandadır və bunu heç kim unutmasın".

Modern.az-a danışan sabiq xarici işlər naziri Tofiq Zülfüqarov bildirib ki, Zəngəzur dəlizinin açılması ilə əlaqədar diplomatik işlər davam etdirilir:

“Yəni bu istiqamətdə təmaslar baş tutur. Həyata keçirilən təmasların nəticəsi Ermənistan siyasi elitasının, ya da cəmiyyətinin bu və ya digər mövzulara hazır olub-olmaması ilə bağlıdır. 2020-ci ildən bu günə qədər Ermənistan cəmiyyətində və siyasi elitasında ciddi dəyişikliklər baş verib. İkinci Qarabağ müharibəsinə qədər Ermənistanın formalaşmış işğalçı ideologiyası, Azərbaycanın diplomatik və siyasi təzyiqi nəticəsində artıq dəyişməyə başlayıb. Bəzi reallıqlar orada öz yerini tapır. Yəni müharibədən qabaq, onlar işğal olunmuş əraziləri Ermənistanın bir hissəsi  kimi düşünürdülər. Müharibə zamanı müəyyən terminlərdən istifadə edib, Azərbaycanı işğalçı tərəf kimi qələmə verməyə çalışırdılar. Beynəlxalq qanunlara zidd olan yanaşma o qədər güclənmişdi ki, onlar az qala açıq-açığına faşist ideologiyasını müdafiə edirdilər. Görürük ki, bu dəyişikliklər yavaş-yavaş davam edir.Əlbəttə, biz bu prosesin  sürətli olmasını istərdik".

Sabiq nazir Azərbaycanın Zəngəzur dəhlizinin açılması ilə bağlı ikinci yolunun da olduğunu söyləyib:

"Hesab edirəm ki, Zəngəzur və digər mövzular Ermənistan cəmiyyətinin və siyasi elitasının fikirlərinin və mövqelərinin dəyişməsi prosesi ilə bağlıdır. Gələn il Ermənistanda seçkilər baş verməlidir. Mən bu şəraitdən istifadə edən qüvvələrin daha kəskin, sülhə aparmayan bəyanatlar verəcəyini düşünmürəm.  Ermənilərin öz mövqelərini dəyişib, beynəlxalq qanunlara uyğun davranacağı məsələsində optimist deyil. Zəngəzur dəhlizi məsələsi iki yolla həll oluna bilər. İkinci yol Azərbaycanın tarixi ədaləti bərpa etməsi ilə bağlıdır. Hesab edirəm ki, bu baxımdan məsələ gündəmdə olacaq. Əgər belə getsə, qarşıdurma yolunu seçsələr, onlara qarşı addımlarımız adekvat ola bilər. İkinci yolun, yəni tarixi ədalətin bərpasını mən heç də istisna etmirəm. Bunu daha real görürəm".