Prezident İlham Əliyev ötən gün yerli televiziya kanallarına müsahibə verib. Ölkə başçısı müsahibəsində Ermənistana məsələhətlər verib. "Əgər Ermənistana sülh müqaviləsi lazım deyilsə, bizə də lazım deyil. Bu imzalanmadan da biz yaşaya və öz siyasətimizi apara bilərik", - dövlət başçısı qeyd edib.

Ermənistan tərəfinə hər şeyi, o cümlədən dünyadakı geosiyasi dəyişiklikləri yaxşı ölçüb-biçməyi məsləhət görən Azərbaycan Prezidenti əlavə edib:

“Onların yaxın dostları siyasi səhnədən biabırçılıqla silinirlər. Bax, dünən xəbər gəldi ki, Ermənistanın və Paşinyanın yaxın dostu cənab Trüdo da vəzifədən getməli oldu. Həmin bu ölkə ki, İkinci Qarabağ müharibəsi dövründə və ondan sonrakı dövrdə qatı anti-Azərbaycan mövqeyində idi, heç Fransadan çox da uzağa getmir. Fransaya gəldikdə, indi orada siyasi səhnədə nələr baş verir? Hər kəs özü görür”.

Maraqlıdır, Ermənistan hakimiyyəti bundan nəticə çıxaracaqmı?

Məsələ ilə bağlı Modern.az-a danışan politoloq Elxan Şahinoğlu bildirib ki, Nikol Paşinyan özündə cəsarət tapıb Azərbaycanla sülh müqaviləsini imzalamağa çalışmalıdır:

“Ermənistan Baş naziri Nikol Paşinyan özündə cəsarət tapıb bu il ərzində konstitusiya dəyişikliklərinə gedib, Azərbaycanla sülh sazişi imzalamağa çalışmalıdır. Yox, bunun əvəzinə o silahlanmağa üstünlük verərsə, sülh imzalamaqdan yayınarsa, bu,bölgədə vəziyyəti gərginləşdərəcək. Hətta sonrakı il toqquşma ehtimalını artıracaq. Ona görə hesab edirəm ki, Prezident İlham Əliyev bu mənada Paşinyana xəbərdarlıq edir. O, sülh imzalamaq və əməkdaşlıq etmək istəsə, bu il bunun üçün münbit şərait yarada bilər”.

E.Şahinoğlu söyləyib ki, Paşinyan xəbərdarlıqdan nəticə çıxarmasa, mümkün toqquşmada yenə də, məğlub olacaq:

“Ermənistan Baş naziri Nikol Paşinyan prosesi uzatmağa çalışarsa,bu, vəziyyəti gərginləşdirib, toqquşma ehtimalını artıracaq. Ermənistan əvvəllər Rusiyanın əmrlərini yerinə yetirirdisə, indi Vaşinqtondan gələn əmrləri yerinə yetirir. Paşinyan anlamalıdır ki, o, öz ölkəsinin maraqlarından çıxış edirsə, ona sülh lazımdır. Ermənistan nə qədər silah alsa və hərbi  büdcəsini artırsa da, ölkə başçısı İlham Əliyevin dediyi kimi Azərbaycanla ayaqlaşa bilməyəcək. Mümkün toqquşmada yenə də, özü və ölkəsi məğlub olacaq”.