Ermənistan Respublikası ilə ABŞ arasında yanvarın 14-də imzalanmış Strateji Tərəfdaşlıq Xartiyasına uyğun olaraq müvafiq komissiya yaradılıb. Komissiya iqtisadi, təhlükəsizlik və müdafiə, demokratiya, ədalət, inklüzivlik məsələləri üzrə çalışacaq.
Dövlət katibi Antoni Blinken bəyan edib ki, ABŞ-dan sərhəd mühafizəsi üzrə xüsusi qrup Ermənistana gedəcək. O qeyd edib ki, xüsusi qrup birgə sərhəd təhlükəsizliyi istiqamətində iş aparacaq, təhlükəsizlik istiqamətində müvafiq işləri gücləndirəcək. Blinken Ermənistan və ABŞ arasında strateji tərəfdaşlıq sazişinin imzalanması mərasimində bildirib ki, “Qartal tərəfdaşı” formatı çərçivəsində əməkdaşlıq davam edəcək.
O, sərhəd mühafizəsi üzrə xüsusi qrupun nə işlər görəcəyini və hansı istiqamətdə yerləşdiriləcəyini açıqlamayıb.
İrəvan və Vaşinqton həmçinin nüvə əməkdaşlıq sazişi üzrə danışıqlara başlandığını elan edib.
Xarici işlər naziri Ararat Mirzoyanın sözlərinə görə, Ermənistan İŞİD ilə mübarizədə ABŞ-ın rəhbərlik etdiyi koalisiyaya qoşulmaq niyyətindədir.
Maraqlıdır ki, İran Prezidenti Məsud Pezeşkian bu yaxınlarda Rusiyaya səfər edəcək. Səfər zamanı regional məsələlər müzakirə olunacaq. Eyni zamanda iki ölkə arasında strateji müttəfiqlik barədə sənədin imzalanması gözlənilir.
Bəs ard-arda atılan bu təzadlı addımlar Azərbaycana nələr vəd edirmi? Cənubi Qafqazda nə baş verir?
Sabiq xarici işlər naziri Tofiq Zülfüqarov Modern.az-a bildirib ki, Ermənistanla ABŞ arasında imzalanan sənədin icrası çətin prosesdir:
“Uzun müddət Ermənistanın ABŞ-la təhlükəsizlik və müdafiə sahəsinə aid əməkdaşlığı olmayıb. ABŞ bu ölkəni Rusiyanın müttəfiqi kimi qəbul edib. Real olaraq Ermənistan Rusiyanın hərbi müttəfiqidir. Ona görə də, ABŞ və Qərb ölkələri Ermənistanla bu sahədə əməkdaşlıq etmirlər. Amma Azərbaycanla ABŞ arasında təhlükəsizlik sahəsində genişlənmiş dialoq 25 ildən çoxdur ki, mövcuddur. Bu çərçivədə ABŞ Azərbaycanla bir sıra təhlükəsizlik layihələri həyata keçirib. Bu layihələr sərhəddə və Xəzərdə təhlükəsizlik məsələlərində özünü büruzə verib. Bayden administrasiyası belə qərara gəlib ki, Ermənistanla hər hansı şəkildə təhlükəzilik və əməkdaşlığa yol verilsin. Ermənistan tərəfi az qala göstərməyə çalışır ki, ABŞ onların müttəfiqidir. Amma bu, belə deyil. Çünki bu sənədə qəribə şəraitdə qol çəkilib. Səlahiyyəti bitən administrasiya formal olaraq hansısa sənədə qol çəkir. Görünür, Bayden administrasiyası Tramp administrasiyasına qarşı belə bir addım atmaq qərarına gəlib. Bu sənədə qol çəkilməsi Ermənistana yeni problemlər yaradacaq, ən azı Tramp administrasiyası tərəfindən. Çünki bəllidir ki, bu, demonstrativ şəkildə Trampa siyasi zərbədir. Bu baxımdan başa düşmürəm ki, şərhçilərimiz nəyə görə ermənilərin təbliğat tezislərini tirajlayırlar. Bu sənəd Ermənistana Azərbaycanla hansısa səviyyəyə çıxmağa imkan verdi. Amma onun icrası çox böyük sual altındadır. Çünki praktiki olaraq, Ermənistan hələ də Rusiyanın hərbi müttəfiqi olaraq, qalır”.
Sabiq nazir sabah Rusiya ilə İran arasında imzalanacaq strateji müttəfiqlik barədə sənəd haqda da danışıb:
“Doğrusu mən İranla Rusiya arasında imzalanacaq strateji müttəfiqlik barədə sənədə də çox böyük önəm verməyin tərəfdarı deyiləm. Çünki həm İranın indiki administrasiyası, həm də Rusiya rəhbərliyi bu addımı məhz Trampın səlahiyyətə gəlməsi ərəfəsində atırlar. Əminəm ki, hər iki tərəf Trampla danışıqlarda, siyasi alverdə bundan istifadə edəcəklər. Çünki hamı başa düşür ki, söz sahibi ABŞ-dir. Həm İranın, həm də Rusiyanın Tramp administrasiyası ilə təmasları mövcud idi. İndi isə təzə təmaslara hazırlaşarkən həm İran, həm də Rusiya “güc” faktorunu nümayiş etdirmək niyyətindədir. Təbii ki, siyasi alverdə qurban verilən elə ilk bu sənəd olacaq”.
